సోషల్ మీడియా ప్లాట్ఫామ్స్ ద్వారా విపరీతమైన క్రేజ్ సంపాదించుకుని, ఆ తర్వాత బుల్లితెరపై, వెండితెరపై తనదైన ముద్ర వేసిన యూట్యూబ్ స్టార్, బిగ్బాస్ ఫేమ్ షణ్ముఖ్ జస్వంత్ (షన్నూ) తన జీవితంలో సరికొత్త అధ్యాయాన్ని ప్రారంభించాడు. గత కొంతకాలంగా తన లవ్ లైఫ్, పెళ్లి గురించి వస్తున్న ఊహాగానాలకు తెరదించుతూ.. ఎట్టకేలకు బ్యాచిలర్ లైఫ్కు గుడ్ బై చెప్పేసి ఓ ఇంటివాడయ్యాడు. ఎలాంటి ఆర్భాటాలు, హడావుడి లేకుండా అత్యంత సన్నిహితులు, ఇరు కుటుంబ సభ్యుల సమక్షంలో అత్యంత వైభవంగా షణ్ముఖ్ వివాహం జరిగింది.
తూర్పుగోదావరి జిల్లా రాజమహేంద్రవరానికి చెందిన ప్రముఖ సోషల్ మీడియా ఇన్ఫ్లూయెన్సర్ వైష్ణవి చోడిశెట్టితో షణ్ముఖ్ వివాహం ఘనంగా జరిగింది. ఈ ఏడాది ఫిబ్రవరిలోనే వీరిద్దరి నిశ్చితార్థ వేడుక కుటుంబ సభ్యుల సమక్షంలో జరగ్గా.. ఆ సమయంలోనే తన కాబోయే భార్యను షన్నూ అభిమానులకు అధికారికంగా పరిచయం చేశాడు. ఇక ఇప్పుడు ఏమాత్రం ఆలస్యం చేయకుండా ఇరువైపులా పెద్దల సమక్షంలో ఈ లవ్ కపుల్ పెళ్లి పీటలెక్కారు. సాంప్రదాయబద్ధంగా జరిగిన ఈ వివాహ వేడుకకు సంబంధించిన వెడ్డింగ్ ఫొటోలు, వీడియోలు ప్రస్తుతం ఇంటర్నెట్ను షేక్ చేస్తున్నాయి. ఈ సరికొత్త జంటను చూసిన నెటిజన్లు “మేడ్ ఫర్ ఈచ్ అదర్”, “క్యూట్ కపుల్” అంటూ సోషల్ మీడియా వేదికగా శుభాకాంక్షల వర్షం కురిపిస్తున్నారు.
యూట్యూబ్ స్టార్ నుండి బిగ్బాస్ రన్నరప్ వరకు
షణ్ముఖ్ జస్వంత్ కెరీర్ ప్రస్థానం చూస్తే.. యూట్యూబ్లో పలు షార్ట్ ఫిలిమ్స్, సాఫ్ట్వేర్ డెవలపర్, సూర్య వంటి వెబ్ సిరీస్లు, క్రేజీ మ్యూజిక్ ఆల్బమ్స్తో యూత్లో విపరీతమైన ఫ్యాన్ ఫాలోయింగ్ సొంతం చేసుకున్నాడు. ఈ పాపులారిటీతోనే అతనికి బిగ్బాస్ తెలుగు సీజన్ 5లో పాల్గొనే లక్కీ ఛాన్స్ దక్కింది. హౌస్లోకి అడుగుపెట్టిన మొదటి రోజు నుంచే టైటిల్ ఫేవరెట్గా నిలిచిన షణ్నూ.. తన స్ట్రాంగ్ గేమ్తో ప్రేక్షకులను ఆకట్టుకుని రన్నరప్గా నిలిచాడు. ప్రస్తుతం డిజిటల్ ప్రాజెక్ట్లతో పాటు హీరోగా ఒక క్రేజీ సినిమా చేస్తూ కెరీర్ పరంగా ఎంతో బిజీగా గడుపుతున్నాడు.
ఒడిదుడుకులు.. కొత్త ప్రయాణం
షణ్ముఖ్ కెరీర్ గ్రాఫ్ ఎంత వేగంగా పెరిగిందో, అతని పర్సనల్ లైఫ్ కూడా అంతే చర్చనీయాంశంగా మారింది. గతంలో సోషల్ మీడియా స్టార్ దీప్తి సునయనతో షణ్నూ సుదీర్ఘ కాలం పాటు ప్రేమాయణం సాగించిన సంగతి తెలిసిందే. వీరిద్దరి కాంబినేషన్లో వచ్చిన కవర్ సాంగ్స్, వీడియోస్ నెట్టింట సెన్సేషన్ క్రియేట్ చేశాయి. అయితే బిగ్బాస్ హౌస్లో తోటి కంటెస్టెంట్ సిరి హనుమంత్తో ఏర్పడిన స్నేహం, ఆ తర్వాత మారిన పరిణామాలు షణ్నూ వ్యక్తిగత జీవితంపై తీవ్ర ప్రభావం చూపాయి. షో ముగిసిన కొంత కాలానికి విభేదాల కారణంగా దీప్తి, షణ్నూ అధికారికంగా బ్రేకప్ చెప్పుకుని విడిపోయారు.
గతంలో డ్రగ్స్ వినియోగం కేసులో షణ్ముఖ్ని నార్సింగి పోలీసులు అరెస్ట్ చేయడం తీవ్ర కలకలం రేపింది. ఆ తర్వాత వ్యక్తిగత వివాదాలు, సమస్యలను పక్కన పెట్టి మళ్లీ కెరీర్పై పూర్తి ఫోకస్ పెట్టాడు. ఈ క్రమంలోనే అతని జీవితంలోకి వైష్ణవి ప్రవేశించడం, ఇద్దరూ ప్రేమలో పడటం, పెద్దలను ఒప్పించి పెళ్లికి గ్రీన్ సిగ్నల్ తెచ్చుకోవడం చకచకా జరిగిపోయాయి. గతంలో ఎదురైన చేదు అనుభవాలను దాటుకుని ఇప్పుడు వైష్ణవితో కలిసి జీవితంలో సరికొత్త చాప్టర్ ప్రారంభించిన షణ్నూకు టాలీవుడ్ సెలబ్రిటీలు, తోటి యూట్యూబర్లు బెస్ట్ విషెస్ చెప్తున్నారు.