విజయ్ దేవరకొండ, పూరి జగన్నాథ్ కాంబోలో ఆగస్ట్ 25న లైగర్ అనే చిత్రం రాబోతోన్న సంగతి తెలిసిందే. ఈ చిత్రాన్ని కరణ్ జోహార్, పూరి జగన్నాథ్, ఛార్మీ కలిసి సంయుక్తంగా నిర్మిస్తోన్న సంగతి తెలిసిందే. ఈ సినిమాలో అనన్య పాండే హీరోయిన్‌గా నటిస్తోంది. అయితే ఈ చిత్రాన్ని బాయ్ కాట్ చేయాలంటూ గత కొన్ని రోజులుగా నెట్టింట్లో ట్రెండ్ అవుతోన్న సంగతి తెలిసిందే.
విజయ్ దేవరకొండ తన లైగర్ సినిమా ప్రమోషన్స్‌లో పాల్గొంటూ.. ఆమిర్ ఖాన్ లాల్ సింగ్ చడ్డాను బాయ్ కాట్ చేయడంపై స్పందించాడు. ఆమిర్ ఖాన్ సినిమాను బ్యాన్ చేసి.. కేవలం ఆయన్ను మాత్రమే బాధపెట్టడం లేదు.. ఎంతో మందిని దెబ్బ తీశారు.. దేశ ఆర్థిక వ్యవస్థ మీద ప్రభావం పడుతుందంటూ ఇలా ఏదేదో పిచ్చిగా వాగేశాడు విజయ్ దేవరకొండ. దీంతో లైగర్ సినిమాను బాయ్ కాట్ చేయాలంటూ ట్రెండ్ మొదలైంది.
ఇక ఈ చిత్రానికి కరణ్ జోహర్ నిర్మాతగా ఉండటం, స్టార్ కిడ్ అనన్య పాండే నటించడం కూడా ఈ బాయ్‌కాట్ ట్రెండ్‌కు కారణమైంది. అయితే ఇప్పుడు నెటిజన్లకు మరొక కొత్త కారణం కూడా దొరికింది. ఇస్మార్ట్ శంకర్ సినిమాలో పూరి ఓ సీన్ పెట్టాడట. అందులో హీరోయిన్‌కు ఇష్టం లేకపోయినా కూడా హీరో వెంటపడటం, రేప్ చేసేందుకు ఇంటికి రావడం, దౌర్జన్యం చేయడం అనేది వేదింపుల కిందకే వస్తుందట.
అలాంటి సీన్లు తీసిన డైరెక్టర్ పూరి చిత్రం లైగర్ కాబట్టి.. దాన్ని కూడా బాయ్ కాట్ చేయాల్సందే అంటూ లైగర్ బాయ్ కాట్ అనే ట్రెండ్‌ను చేస్తున్నారట. సినిమా బాగుంటే.. ఈ బాయ్ కాట్ ట్రెండ్‌లు ఏమీ చేయలేవని విజయ్ ఎంతో ధైర్యంగా చెప్పేశాడు.