పవన్ కళ్యాణ్ (Pawan Kalyan) తాజా వ్యాఖ్యలు సినీ పరిశ్రమలోనే కాక, రాజకీయ వర్గాల్లో కూడా చర్చనీయాంశంగా మారాయి. ‘హరిహర వీరమల్లు’ ప్రీ రిలీజ్ ఈవెంట్ (Hari Hara Veera Mallu Pre Release Event) సందర్భంగా మాట్లాడిన పవన్, తాను రీమేక్ సినిమాలు ఎందుకు చేస్తానన్న విషయాన్ని నిజాయితీగా వెల్లడించారు. “నాకు పెద్ద పెద్ద దర్శకులు లేరు. కొత్త సినిమాలు చేయలేక కాదు. రీమేక్ వల్ల పని తక్కువ అవుతుంది. అంతేగాక, నా కుటుంబాన్ని, పార్టీని పోషించాలంటే డబ్బు కావాలి కదా” అని స్పష్టంగా చెప్పారు. ఈ వ్యాఖ్యలు ఆయన ప్రామాణికతను చూపిస్తుండగా, ఒక స్టార్ హీరో ఇలా చెప్పడం చాలా అరుదు.
ఇక గతంలో ఎదురైన కష్టాలను కూడా పవన్ కళ్యాణ్ గుర్తు చేసుకున్నారు. ఒక ఫ్లాప్ సినిమా తన కెరీర్‌ను తీవ్రంగా ప్రభావితం చేసిన విషయాన్ని ఆయన ప్రస్తావించారు. ఆ తర్వాత కొత్తగా సినిమాలు చేయడం ఆగిపోయిందని, సినీ రంగంలో గ్రిప్ కోల్పోయానని తెలిపారు. ఈ సమయంలో దర్శకుడు త్రివిక్రమ్ శ్రీనివాస్ తనకు మద్దతుగా నిలిచారని పేర్కొన్నారు. త్రివిక్రమ్ తనకు పెద్దగా పరిచయం కూడా లేని సమయంలో ‘జల్సా’ చిత్రాన్ని తీశారని పవన్ గుర్తు చేశారు.
Midhun Reddy Remand : మిథున్ రెడ్డి జైలులో కోరిన సదుపాయాలివే!
త్రివిక్రమ్ తనకు మిత్రుడే కాదు, ఆపద్బాంధవుడని పవన్ అభివర్ణించారు. సినీ రంగంలో కష్టాలే ఎక్కువగా ఎదురైనా, తాను కుంగిపోలేదని, కొందరు నిజమైన మిత్రులు తనకు అండగా నిలిచారని భావోద్వేగంగా తెలిపారు. ‘నేను పడిపోయినా కింద పడ్డా లేచినా ఉన్నా… అన్నా నీ వెంట మేమున్నాం అంటూ ఫ్యాన్స్ నాకు ధైర్యం ఇచ్చారు. నా దగ్గర ఏమైనా వెపన్స్ ఉంటాయా? నా దగ్గర ఏమైనా గూండాలు ఉంటారా? నా దగ్గర ఎవ్వరూ లేరు. గుండెల్లో ఉండే మీరు తప్ప. ఇండస్ట్రీకి వచ్చి ఇన్నేళ్లయినా అదే గుండె ధైర్యం, అదే తెగింపు నాలో ఉన్నాయి. నేను డబ్బుకు ఎప్పుడూ ప్రాధాన్యం ఇవ్వలేదు. బంధాలకు మాత్రమే ప్రాధాన్యమిచ్చాను. నాకు ఎప్పుడూ ఫ్యాన్స్ అండగా ఉన్నారు.’ అని అన్నారు.
ఈ వ్యాఖ్యలు పవన్ కళ్యాణ్‌ను ఒక నిజాయితీగల వ్యక్తిగా మళ్లీ ప్రజల ముందుకు తెచ్చాయి. రాజకీయంగా, సినీ రంగాల్లో సమతుల్యంగా కొనసాగుతున్న ఆయన ఇలా తెగేసి డబ్బు కోసం రీమేక్ చేస్తున్నానని చెప్పడం పలువురికి ఆశ్చర్యం కలిగించవచ్చు. కానీ ఇది అభిమానులకు, వ్యతిరేకులకు ఆయనను మరింత అర్థం చేసుకునే అవకాశం కలిగించింది. ఇక ‘హరిహర వీరమల్లు’ సినిమా విడుదలకు ముందు వచ్చిన ఈ మాటలు సినిమాపై ఆసక్తిని మరింతగా పెంచాయి.
Anshul Kamboj: టీమిండియాలోకి రంజీ స్టార్.. ఎవ‌రీ అంశుల్ కంబోజ్‌?