Director Sanoj Mishra Arrested: మహాకుంభ్ మేళాలో వైరల్ సంచలనంగా మారిన మోనాలిసా అనే యువతికి తన సినిమాలో పాత్ర అందించిన దర్శకుడు సనోజ్ మిశ్రా అరెస్ట్ (Director Sanoj Mishra Arrested) అయ్యారు. అత్యాచారం కేసులో మార్చి 31న అరెస్టయ్యాడు. ఢిల్లీ హైకోర్టు అతని బెయిల్ అర్జీని తిరస్కరించిన తర్వాత ఢిల్లీ పోలీసులు గాజియాబాద్లో అతన్ని అదుపులోకి తీసుకున్నారు. ఈ అరెస్ట్ నబీ కరీం పోలీస్ స్టేషన్ పరిధిలో జరిగింది.
కేసు వివరాలు
సనోజ్ మిశ్రాపై ఒక 28 ఏళ్ల మహిళ ఆరోపణలు చేసింది. ఆమె చిన్న పట్టణం నుంచి వచ్చిన నటి కావాలనే ఆకాంక్షతో ఉన్న వ్యక్తి. 2020లో టిక్టాక్, ఇన్స్టాగ్రామ్ ద్వారా సనోజ్ మిశ్రాతో పరిచయం ఏర్పడిందని, అప్పటి నుంచి నాలుగు సంవత్సరాల పాటు అతను తనపై పలుమార్లు అత్యాచారం చేశాడని ఆమె ఆరోపించింది. ముంబైలో అతనితో లివ్-ఇన్ రిలేషన్షిప్లో ఉన్న సమయంలో ఈ ఘటనలు జరిగాయని, మూడుసార్లు గర్భస్రావం చేయమని బలవంతం చేశాడని ఆమె తెలిపింది.
Also Read: Ration Cards: వారి రేషన్ కార్డులు తొలగిస్తాం.. మంత్రి శ్రీధర్ బాబు ప్రకటన!
2021 జూన్ 17న సనోజ్ మిశ్రా ఝాన్సీ రైల్వే స్టేషన్కు వచ్చానని ఆమెకు ఫోన్ చేసి, ఆత్మహత్య చేసుకుంటానని బెదిరించాడు. భయపడిన ఆమె అతన్ని కలవడానికి వెళ్లగా మరుసటి రోజు జూన్ 18న ఆమెను ఒక రిసార్ట్కు తీసుకెళ్లి, మత్తు పదార్థాలు ఇచ్చి అత్యాచారం చేసినట్లు ఆరోపణలు ఉన్నాయి. అతను అసభ్య వీడియోలను రికార్డ్ చేసి, వాటిని బయటపెడతానని బెదిరించినట్లు కూడా ఆమె పేర్కొంది.
సనోజ్ మిశ్రా మహాకుంభ్ 2025లో పూసలు అమ్ముతూ సోషల్ మీడియాలో వైరల్ అయిన 16 ఏళ్ల మోనాలిసా భోస్లేకు తన తదుపరి చిత్రం “ది డైరీ ఆఫ్ 2025″లో అవకాశం ఇచ్చినట్లు ప్రకటించాడు. ఆమెకు నటనలో శిక్షణ కూడా ఇస్తున్నట్లు వార్తలు వచ్చాయి. అయితే ఈ కేసు వెలుగులోకి రావడంతో సినీ పరిశ్రమలో కలకలం రేగింది. మరోవైపు సనోజ్ మిశ్రా బెయిల్ అర్జీ ఢిల్లీ హైకోర్టు తిరస్కరించడంతో అతను ప్రస్తుతం పోలీసు కస్టడీలో ఉన్నాడు. ఈ కేసుపై దర్యాప్తు కొనసాగుతోంది. ఈ ఘటన మోనాలిసా సినిమా ప్రాజెక్ట్పై ఎలాంటి ప్రభావం చూపుతుందనేది ఇంకా స్పష్టంగా తెలియదు.