కన్నడ సినీ పరిశ్రమలో మరోసారి సంచలనం సృష్టిస్తున్న చిత్రం ‘కాంతార చాప్టర్–1’(Kantara Chapter 1). రిషబ్ శెట్టి స్వీయ దర్శకత్వంలో తెరకెక్కిన ఈ సినిమా విడుదలైన మొదటి వారంలోనే వసూళ్ల పరంగా రికార్డులు బద్దలుకొడుతోంది. దేశవ్యాప్తంగా అద్భుతమైన రివ్యూలతో పాటు ప్రేక్షకుల మౌత్ టాక్‌ కూడా ఈ సినిమాకు బలంగా మారింది. రిషబ్ శెట్టి గతంలో తెరకెక్కించిన కాంతార చిత్రం ఎంతగా ఆదరణ పొందిందో, దాని ప్రీక్వెల్‌గా వచ్చిన ఈ చాప్టర్-1 కూడా అదే స్థాయిలో ప్రేక్షకులను ఆకట్టుకుంటోంది. మేకర్స్ వెల్లడించిన వివరాల ప్రకారం, కేవలం మొదటి వారంలోనే రూ. 509.25 కోట్ల గ్రాస్ వసూలు చేయడం ద్వారా ఇది దక్షిణ భారత సినిమాల్లో టాప్ గ్రాస్‌ర్ల జాబితాలో స్థానం దక్కించుకుంది.
Jubilee Hills Bypoll : అంజన్ కుమార్ యాదవ్ ను బుజ్జగించే పనిలో కాంగ్రెస్
ఈ సినిమాలో రిషబ్ శెట్టితో పాటు రుక్మిణి వసంత్, జయరామ్ కీలక పాత్రల్లో నటించారు. ముఖ్యంగా రిషబ్ శెట్టి పోషించిన పాత్రలోని ఇంటెన్సిటీ, ఆయన తెరపై ప్రదర్శించిన భావప్రకటనలు ప్రేక్షకులను థియేటర్లకు ఆకర్షిస్తున్నాయి. భూతా కోలా, నమ్మకాలపై ఆధారపడి నడిచే ఈ కథలోని సాంస్కృతిక అంశాలు, గ్రామీణ నేపథ్యంలో ఉండే సన్నివేశాలు ప్రేక్షకుల హృదయాలను తాకుతున్నాయి. దేవతా సంప్రదాయాలు, భక్తి, ధర్మం, మనిషి–ప్రకృతి మధ్య ఉన్న ఆధ్యాత్మిక బంధం వంటి విషయాలను ఈ చిత్రం గాఢంగా చూపించింది. సాంకేతికంగా కూడా ఈ చిత్రం అత్యుత్తమమైన విజువల్స్, బ్యాక్‌గ్రౌండ్ స్కోర్‌తో మెప్పిస్తోంది.
మరోవైపు, సినిమా కలెక్షన్లు ఈ వీకెండ్‌లో మరింత పెరిగే అవకాశం ఉందని ట్రేడ్ విశ్లేషకులు చెబుతున్నారు. దేశీయ మార్కెట్‌తో పాటు విదేశీ మార్కెట్లలో కూడా ఈ చిత్రం మంచి వసూళ్లు సాధిస్తోంది. తెలుగు, తమిళం, హిందీ, మలయాళం భాషల్లో కూడా ఈ సినిమా బలమైన పట్టు సాధించింది. ప్రేక్షకులు థియేటర్లకు తిరిగి రావడంలో ఈ సినిమా కీలక పాత్ర పోషిస్తోందని విశ్లేషకులు పేర్కొంటున్నారు. రిషబ్ శెట్టి దర్శకత్వ ప్రతిభకు, కథ చెప్పే శైలికి మరోసారి కీర్తిపతాక ఎగురవేసిన కాంతార చాప్టర్–1, కన్నడ సినిమా గౌరవాన్ని అంతర్జాతీయ స్థాయికి తీసుకెళ్తుందనే అభిప్రాయాలు వ్యక్తమవుతున్నాయి.