iBomma: చాలా సంవత్సరాలుగా భారతీయ చలనచిత్ర పరిశ్రమను ముఖ్యంగా టాలీవుడ్‌ను పట్టి పీడిస్తున్న పైరసీ భూతానికి వ్యతిరేకంగా తెలుగు సినీ పరిశ్రమ, సైబర్ క్రైమ్ పోలీసులు సాధించిన విజయం ఇది. లక్షలాది రూపాయల నష్టానికి కారణమవుతున్న ‘ఐబొమ్మ’ (iBomma), ‘బప్పం’ (Bappam) వంటి భారీ పైరసీ నెట్‌వర్క్‌ల వ్యవస్థాపకుడు ఇమ్మాడి రవిని హైదరాబాద్ పోలీసులు అరెస్టు చేయడంతో సినీ పరిశ్రమ ఊపిరి పీల్చుకుంది.
వందల కోట్లలో నష్టం
‘ఐబొమ్మ’ కేవలం ఒక సాధారణ పైరసీ వెబ్‌సైట్ కాదు. ఇది అత్యంత వ్యవస్థీకృతమైన నెట్‌వర్క్‌గా పనిచేస్తూ, దక్షిణాది చిత్రాలు, OTT కంటెంట్‌ను విడుదలైన కొద్ది గంటల్లోనే ఆన్‌లైన్‌లో లీక్ చేసింది. ఈ ముఠా తమ కార్యకలాపాలను హైదరాబాద్, దుబాయ్, నెదర్లాండ్స్, మయన్మార్ వంటి దేశాలకు విస్తరించడం వల్ల దీనిని ట్రాక్ చేయడం కష్టంగా మారింది. ఈ పైరసీ కారణంగానే 2023లో భారతీయ సినీ పరిశ్రమ రూ. 22,400 కోట్ల నష్టాన్ని చవిచూడగా.. 2024లో టాలీవుడ్ ఒక్కటే సుమారు రూ. 3,700 కోట్ల నష్టాన్ని భరించాల్సి వచ్చింది.
Also Read: Amazon Lay Offs : కోట్లలో లాభాలు అయినప్పటికీ ఉద్యోగులను తొలగింపు..ఏంటి ఈ ఘోరం..?
కీలక అరెస్ట్, ప్రముఖుల ప్రశంసలు
TFCC (తెలుగు ఫిల్మ్ ఛాంబర్ ఆఫ్ కామర్స్), హైదరాబాద్ సైబర్ క్రైమ్ పోలీసులు నెలల తరబడి చేసిన విస్తృత పరిశోధన ఫలించింది. ఈ నెట్‌వర్క్‌కు చెందిన 65 మిర్రర్ సైట్‌లను గుర్తించిన పోలీసులు, వ్యవస్థాపకుడు ఇమ్మాడి రవిని ఫ్రాన్స్ నుండి హైదరాబాద్ విమానాశ్రయానికి తిరిగి రాగానే చాకచక్యంగా అరెస్టు చేశారు. పోలీసుల ఈ చర్యను చిరంజీవి, నాగార్జున, ఎస్.ఎస్. రాజమౌళి, దిల్ రాజు వంటి అగ్ర సినీ ప్రముఖులు హైదరాబాద్ పోలీస్ కమిషనర్ వి.సి. సజ్జనార్‌ను కలిసి అభినందించారు.
దిగ్భ్రాంతికర వివరాలు వెలుగులోకి
రవి అరెస్ట్‌తో షాకింగ్ వివరాలు బయటపడ్డాయి. పోలీసులు 21,000 పైరసీ చిత్రాలు ఉన్న హార్డ్ డిస్క్‌ను, సుమారు 5 మిలియన్ల (50 లక్షల) మంది వినియోగదారుల డేటాను స్వాధీనం చేసుకున్నారు. విచారణలో పైరసీ ద్వారా తాను “వందల కోట్లు” సంపాదించినట్లు రవి అంగీకరించాడు. అతని బ్యాంకు ఖాతాల్లోని రూ. 3 కోట్లను కూడా పోలీసులు స్తంభింపజేశారు. మొత్తం 65కు పైగా మిర్రర్ సైట్‌లను నిలిపివేయడంతో ఈ నెట్‌వర్క్‌కు పెద్ద దెబ్బ తగిలినట్లయింది.
ప్ర‌మాదంలో వినియోగదారుల డేటా
అరెస్టు తర్వాత బయటపడిన మరో తీవ్రమైన అంశం ఏంటంటే.. రవి మిలియన్ల మంది వినియోగదారుల వ్యక్తిగత వివరాలను నిల్వ చేయడమే. ఈ డేటాబేస్ ఇప్పుడు దర్యాప్తులో కీలకంగా మారింది. ఐబొమ్మను ఉపయోగించిన వినియోగదారులు వ్యక్తిగత వివరాలు రికార్డ్ అయినందున స్పామ్, టార్గెటెడ్ స్కామ్‌లు, మోసం, మాల్వేర్ వంటి సైబర్ ప్రమాదాలకు గురయ్యే అవకాశం ఉందని నిపుణులు హెచ్చరిస్తున్నారు.