మైసూర్ శాండల్ సోప్ బ్రాండ్ అంబాసిడర్‌గా తమన్నా.. రెమ్యూన‌రేష‌న్ ఎంతో తెలుసా?!

Tamannaah: సినిమా రంగంలో తనదైన అందం, అభినయంతో ఆకట్టుకునే ప్రముఖ నటి తమన్నా భాటియా పలు అంతర్జాతీయ బ్రాండ్లకు అంబాసిడర్‌గా వ్యవహరిస్తున్నారు. అయితే ఇటీవల ఒక బ్యూటీ సోప్ బ్రాండ్‌కు అంబాసిడర్‌గా సంతకం చేయడంతో ఆమె వివాదంలో చిక్కుకున్నారు. కర్ణాటక ప్రభుత్వ సంస్థ అయిన ‘సోప్స్ అండ్ డిటర్జెంట్స్ లిమిటెడ్’ తమ ప్రసిద్ధ ‘మైసూర్ శాండల్ సోప్’ బ్రాండ్ అంబాసిడర్‌గా తమన్నాను నియమించింది. ఈ నిర్ణయం కర్ణాటకలో పెను వివాదానికి దారితీసింది. స్థానికులు ప్రభుత్వంపై తీవ్రస్థాయిలో విరుచుకుపడుతున్నారు.

వివాదానికి అసలు కారణం ఏమిటి?

‘మైసూర్ శాండల్ సోప్’ అనేది కేవలం ఒక సబ్బు మాత్రమే కాదు. అది కర్ణాటక ప్రజల సెంటిమెంట్‌తో ముడిపడి ఉన్న ఉత్పత్తి. 1916లో మైసూర్ రాజులు ప్రారంభించిన ఈ సంస్థ, కర్ణాటక సంస్కృతి, వారసత్వంలో ఒక భాగంగా మారిపోయింది. అటువంటి ప్రతిష్టాత్మక బ్రాండ్‌కు కన్నడ నటీనటులను కాకుండా ముంబైకి చెందిన తమన్నాను ఎంపిక చేయడంపై అక్కడి ప్రజలు ఆగ్రహం వ్యక్తం చేస్తున్నారు.

వ్యతిరేకతకు ప్రధాన కారణాలు

భాష- సంస్కృతి: తమన్నా భాటియా ముంబైకి చెందినవారని, ఆమెకు కన్నడ భాష రాదని స్థానికులు వాదిస్తున్నారు. కన్నడ సంస్కృతికి ప్రతీకగా భావించే ఈ బ్రాండ్‌కు ఆమె ప్రాతినిధ్యం వహించడం సరికాదని వారి అభిప్రాయం.

స్థానిక నటీనటుల విస్మరణ: కన్నడ చిత్రపరిశ్రమలో ఎంతోమంది ప్రతిభావంతులైన నటీనటులు ఉండగా వారిని కాదని పరభాషా నటిని ఎంచుకోవడంపై కన్నడ సంఘాలు మండిపడుతున్నాయి. “మా కన్నడ కళాకారులలో లోపం ఏమిటి?” అని వారు ప్రశ్నిస్తున్నారు. ఇప్పటికే బెంగళూరులో పలు కన్నడ అనుకూల సంస్థలు నిరసనలు చేపట్టాయి.

Also Read: భోజనం చేసిన వెంటనే నీరు తాగడం సరైనదేనా?

ప్రభుత్వం తమన్నానే ఎందుకు ఎంచుకుంది?

తమన్నాతో కర్ణాటక ప్రభుత్వం రెండేళ్ల కాలానికి ఒప్పందం కుదుర్చుకుంది. ఇందుకు గాను ఆమెకు 6.20 కోట్ల రూపాయలు చెల్లించనున్నారు. కేవలం సబ్బు మాత్రమే కాకుండా కంపెనీకి చెందిన ఇతర ఉత్పత్తులకు కూడా ఆమె ప్రచారం చేయనున్నారు. తమన్నాకు పాన్-ఇండియా గుర్తింపు ఉండటం వల్ల ఇతర రాష్ట్రాల్లో కూడా బ్రాండ్ విక్రయాలను పెంచవచ్చని ప్రభుత్వం భావిస్తోంది. 2030 నాటికి కంపెనీ ఆదాయాన్ని భారీగా పెంచడమే లక్ష్యంగా ఈ నిర్ణయం తీసుకున్నారు.

మంత్రి వివరణ

ఈ వివాదంపై కర్ణాటక పరిశ్రమల శాఖ మంత్రి ఎం.బి. పాటిల్ స్పందించారు. బ్రాండ్ అంబాసిడర్‌ను ఎంపిక చేసేటప్పుడు సోషల్ మీడియా పాపులారిటీ, మార్కెటింగ్ సామర్థ్యాన్ని పరిగణనలోకి తీసుకుంటామని చెప్పారు. “మైసూర్ శాండల్ సోప్ అమ్మకాల్లో కేవలం 18 శాతం మాత్రమే కర్ణాటకలో జరుగుతున్నాయి. దీనిని జాతీయ స్థాయికి తీసుకెళ్లాలంటే పెద్ద సెలబ్రిటీ అవసరం” అని ఆయన వివరించారు. భవిష్యత్తులో హాలీవుడ్ స్టార్లను కూడా ఎంపిక చేసినా ఆశ్చర్యపోవాల్సిన అవసరం లేదని ఆయన చమత్కరించారు.