Hari Hara Veera Mallu: పవర్ స్టార్ పవన్ కళ్యాణ్ నటించిన భారీ బడ్జెట్ చిత్రం ‘హరి హర వీర మల్లు – పార్ట్ 1: స్వార్డ్ వర్సెస్ స్పిరిట్’ (Hari Hara Veera Mallu)బాక్సాఫీస్ వద్ద మిశ్రమ స్పందనతో రెండు రోజులు పూర్తి చేసుకుంది. గ్రాండ్ ఓపెనింగ్ తర్వాత రెండో రోజు కలెక్షన్లలో గణనీయమైన తగ్గుదల నమోదైంది.
తొలి రెండు రోజుల కలెక్షన్ల వివరాలు
పవన్ కళ్యాణ్ అభిమానులు ఎంతో ఆసక్తిగా ఎదురుచూస్తున్న ‘హరి హర వీర మల్లు’ జూలై 24న థియేటర్లలోకి అడుగుపెట్టింది. విడుదలైన మొదటి రోజు ఈ చిత్రం అంచనాలకు మించి వసూళ్లను సాధించి భారీ ఓపెనింగ్ అందుకుంది.
- ప్రీమియర్ షోలు (జులై 23 బుధవారం): రూ. 12.75 కోట్లు (భారత నెట్)
- డే 1 (జులై 24 గురువారం): రూ. 34.75 కోట్లు (భారత నెట్)
- డే 2 (జులై 25 శుక్రవారం): రూ.7.77 కోట్లు – రూ. 8 కోట్లు (భారత నెట్)
ఈ గణాంకాల ప్రకారం.. సినిమా మొత్తం రెండు రోజుల (ప్రీమియర్ షోలతో కలిపి) భారత నెట్ వసూళ్లు రూ. 55.27 కోట్లు నుండి రూ. 55.50 కోట్ల వరకు ఉన్నట్లు తెలుస్తోంది. అయితే డే 1 వసూళ్లతో పోలిస్తే డే 2లో సుమారు 75% పైగా తగ్గుదల నమోదవడం చిత్ర బృందానికి, అభిమానులకు ఆందోళన కలిగించే విషయం. ప్రపంచవ్యాప్తంగా రెండు రోజుల్లో రూ. 70 కోట్ల నుండి రూ. 77 కోట్ల మధ్య వసూళ్లు సాధించినట్లు నివేదికలు చెబుతున్నాయి.
సినిమా ప్రదర్శనపై విశ్లేషణ
‘హరి హర వీర మల్లు’కు లభించిన మిశ్రమ సమీక్షలు కలెక్షన్లపై ప్రభావం చూపినట్లు స్పష్టమవుతోంది. ముఖ్యంగా వీఎఫ్‌ఎక్స్ (VFX) నాణ్యతపై పలువురు విమర్శలు గుప్పించారు. ఇది సినిమా అనుభవాన్ని దెబ్బతీసిందని పేర్కొన్నారు. కథనం కొన్ని చోట్ల నెమ్మదిగా సాగడం.. ముఖ్యంగా రెండో భాగం కొంతమంది ప్రేక్షకుల సహనాన్ని పరీక్షించిందని అభిప్రాయాలు వ్యక్తమవుతున్నాయి.
అయితేపవన్ కళ్యాణ్ స్క్రీన్ ప్రెజెన్స్, నటనకు అభిమానుల నుంచి మంచి స్పందన లభించింది. ఎం.ఎం. కీరవాణి సంగీతం, ముఖ్యంగా బ్యాక్‌గ్రౌండ్ స్కోర్ సినిమాకు ఒక ప్లస్ పాయింట్‌గా నిలిచింది. దర్శకుడు క్రిష్ జాగర్లమూడి భారీ విజన్‌తో ఈ చిత్రాన్ని తెరకెక్కించారు. కానీ నిర్మాణ దశలో జరిగిన జాప్యాలు, మార్పులు సినిమా నాణ్యతపై ప్రభావం చూపినట్లు తెలుస్తోంది. బాబీ డియోల్, నిధి అగర్వాల్, నర్గిస్ ఫక్రి వంటి నటీనటులు కీలక పాత్రల్లో నటించారు.
Also Read: Nose Infection: వర్షాకాలంలో ముక్కుకు సంబంధించిన వ్యాధులు, నివార‌ణ‌లివే!
రానున్న రోజులు కీలకం
భారీ బడ్జెట్‌తో రూపొందించబడిన ఈ చిత్రం బ్రేక్-ఈవెన్ కావాలంటే ప్రపంచవ్యాప్తంగా సుమారు రూ. 225 కోట్ల గ్రాస్ వసూళ్లను సాధించాల్సి ఉంటుందని ట్రేడ్ విశ్లేషకులు అంచనా వేస్తున్నారు. మొదటి రోజు బలమైన వసూళ్లు ఉన్నప్పటికీ.. రెండో రోజు గణనీయమైన తగ్గుదల నిరుత్సాహాన్ని కలిగించింది. వారాంతంలో ముఖ్యంగా శని, ఆదివారాల్లో సినిమా ఎంత మేరకు పుంజుకుంటుందో చూడాలి. ప్రేక్షకుల మౌత్ టాక్ ఆధారంగా కలెక్షన్లు మెరుగుపడే అవకాశం ఉంది.
ఈ సినిమా ‘పార్ట్ 1’ మాత్రమే కావడం సీక్వెల్ కూడా ఉందని మేకర్స్ ప్రకటించారు. మొదటి భాగం విజయం ఆధారంగానే రెండో భాగాన్ని ముందుకు తీసుకెళ్తామని గతంలో పవన్ కళ్యాణ్ కూడా పేర్కొన్నారు. ఈ రెండు రోజుల కలెక్షన్లు, మిశ్రమ సమీక్షల నేపథ్యంలో రెండో భాగంపై అనుమానాలు వ్యక్తమవుతున్నాయి.