Deepika Padukone: దేశ ప్రజారోగ్య చరిత్రలో ఒక కీలక ఘట్టం ఆవిష్కృతమైంది. బాలీవుడ్ స్టార్ హీరోయిన్‌ దీపికా పదుకోణెను (Deepika Padukone) దేశ ఆరోగ్య మరియు కుటుంబ సంక్షేమ మంత్రిత్వ శాఖ భారతదేశపు మొట్టమొదటి ‘మానసిక ఆరోగ్య రాయబారి’ (Mental Health Ambassador)గా నియమించింది. మానసిక ఆరోగ్యం పట్ల సమాజంలో అవగాహన పెంచడానికి, ఈ సమస్యను ప్రజారోగ్యంలో ముఖ్యమైన భాగంగా మార్చడానికి ఈ చారిత్రక చర్యను చేపట్టారు.
మంత్రి జె.పి. నడ్డా ఏమన్నారంటే
ఈ సందర్భంగా కేంద్ర ఆరోగ్య శాఖ మంత్రి జె.పి. నడ్డా మాట్లాడుతూ.. ‘దీపికా పదుకోణెతో ఈ భాగస్వామ్యం భారతదేశంలో మానసిక ఆరోగ్యంపై చర్చను ప్రోత్సహిస్తుంది. దీని ద్వారా ప్రజలలో అవగాహన పెరుగుతుంది. మానసిక ఆరోగ్యానికి సామాజికంగా గుర్తింపు లభించేలా చేయడంలో ఈ చొరవ కీలకమవుతుంది’ అని స్పష్టం చేశారు.
‘టెలీ-మానస్’ యాప్ ప్రారంభం
ప్రపంచ మానసిక ఆరోగ్య దినోత్సవం సందర్భంగా కేంద్ర ఆరోగ్య మంత్రి జె.పి. నడ్డా దేశవ్యాప్తంగా పౌరుల కోసం ఒక పెద్ద కార్యక్రమాన్ని ప్రారంభించారు. రాజధాని ఢిల్లీలో జరిగిన ప్రత్యేక కార్యక్రమంలో ఆయన కొత్త రూపంలోని ‘టెలీ-మానస్’ (Tele-MANAS) యాప్‌ను ప్రారంభించారు. మానసిక ఆరోగ్య సేవలను మరింత అందుబాటులోకి తీసుకురావడానికి, సంక్షోభ సమయంలో తక్షణ సహాయం అందించడానికి ఈ యాప్‌ను రూపొందించారు.
Also Read: CSK: సీఎస్కే కీలక నిర్ణ‌యం.. ఈ ఆట‌గాళ్ల‌ను విడుద‌ల చేయ‌నున్న చెన్నై!
గౌరవం పట్ల దీపికా సంతోషం
భారత ప్రభుత్వం తీసుకున్న ఈ చొరవ గురించి మాట్లాడిన దీపికా.. ఈ నియామకం పట్ల అపారమైన సంతోషం వ్యక్తం చేశారు. ‘కేంద్ర ఆరోగ్య మంత్రిత్వ శాఖకు తొలి మానసిక ఆరోగ్య రాయబారిగా నియమించబడటం నాకు చాలా పెద్ద గౌరవం. ప్రధానమంత్రి నరేంద్ర మోదీ నాయకత్వంలో భారతదేశం మానసిక ఆరోగ్యానికి ప్రాధాన్యత ఇచ్చింది. దేశంలోని మానసిక ఆరోగ్య వ్యవస్థను బలోపేతం చేయడానికి మంత్రిత్వ శాఖతో కలిసి పనిచేయడానికి నేను పూర్తిగా సిద్ధంగా ఉన్నాను’ అని ఆమె పేర్కొన్నారు.
దీపికా సినిమా విశేషాలు
సినీ కెరీర్ విషయానికి వస్తే.. దీపికా ప్రస్తుతం తన రాబోయే చిత్రం ‘కింగ్’ షూటింగ్‌లో బిజీగా ఉన్నారు. ఈ చిత్రంలో ఆమె బాలీవుడ్ బాద్‌షా షారుఖ్ ఖాన్‌తో కలిసి చాలా సంవత్సరాల తర్వాత కనిపించనున్నారు. దీనితో పాటు, దీపికా పదుకోణె తమిళ దర్శకుడు అట్లీ దర్శకత్వం వహిస్తున్న తెలుగు చిత్రం ‘AA22xA6’లో కూడా నటిస్తున్నారు, ఇందులో ఐకాన్ స్టార్ అల్లు అర్జున్ హీరోగా నటిస్తున్నారు.