Shilpa Shetty- Raj Kundra : ముంబయికి చెందిన ప్రముఖ వ్యాపారవేత్త దీపక్ కొఠారి చేసిన ఫిర్యాదుతో బాలీవుడ్ నటి శిల్పా శెట్టి, ఆమె భర్త వ్యాపారవేత్త రాజ్ కుంద్రాలపై మోసానికి సంబంధించిన కేసు నమోదైంది. పెట్టుబడి ఒప్పందంలో భారీగా మోసపోయానంటూ దీపక్ చేసిన ఆరోపణలపై జుహు పోలీస్ స్టేషన్లో మొదటిగా FIR నమోదు చేయబడింది. అనంతరం ఈ కేసును ఆర్థిక నేరాల విభాగానికి (EOW) బదిలీ చేశారు. ప్రస్తుతం విచారణ శరవేగంగా కొనసాగుతున్నట్టు సమాచారం.
ఒప్పందానికి తెరలెనిన నేపథ్యం
దీపక్ కొఠారి తెలిపిన వివరాల ప్రకారం, 2015 నుండి 2023 మధ్య కాలంలో బెస్ట్ డీల్ టీవీ అనే ఆన్లైన్ షాపింగ్ ప్లాట్ఫామ్లో పెట్టుబడి పెట్టే ఉద్దేశంతో, శిల్పా-రాజ్ దంపతులతో ఆయన వ్యాపార ఒప్పందం చేసుకున్నాడు. ఈ కంపెనీలో ఆ సమయంలో రాజ్ కుంద్రాకు అధికంగా 87 శాతం వాటా ఉండగా, శిల్పా శెట్టి డైరెక్టర్గా కొనసాగుతూ, తన వ్యక్తిగత హామీ కూడా ఇచ్చినట్లు పేర్కొన్నారు. ఈ హామీ ఆధారంగా దీపక్ కొఠారి కంపెనీలో మొత్తం రూ.60.48 కోట్ల పెట్టుబడి పెట్టినట్టు చెప్పారు. అయితే, ఈ మొత్తాన్ని వారు కంపెనీ అభివృద్ధికి కాకుండా వ్యక్తిగత అవసరాలకు వినియోగించారని తీవ్ర ఆరోపణలు చేశారు.
శిల్పా రాజీనామా, దివాలా ప్రకటన..దాగిన నిజాలు?
2016 ఏప్రిల్లో శిల్పా శెట్టి డైరెక్టర్ పదవికి రాజీనామా చేసినట్లు తాజాగా బయటపడిన సమాచారం. దీపక్ ఫిర్యాదులో పేర్కొనిన ప్రకారం, ఆమె రాజీనామా చేసిన విషయం తనకు తెలియనిచ్చకుండా దాచిపెట్టారని ఆరోపించారు. ఇదే సమయంలో కంపెనీ ఆర్థికంగా తీవ్ర ఇబ్బందుల్లో పడిపోయిందనీ, చివరికి దివాలా ప్రకటించిందని వివరించారు.
కేసు తదుపరి దశ..విచారణలో కీలక మలుపు
ఈ ఫిర్యాదును జుహు పోలీసులు ఆమోదించిన తర్వాత, ఆర్థిక నేరాల విభాగం (EOW) విచారణ చేపట్టింది. ఈ వ్యవహారంలో డబ్బుల లావాదేవీలు, ఒప్పంద పత్రాలు, కంపెనీ వ్యవహారాలపై సమగ్రంగా పరిశీలన జరుపుతున్నట్టు సమాచారం. దీపక్ కొఠారి అందించిన ఆధారాల ఆధారంగా కేసు మరింత బలపడే అవకాశం ఉన్నట్టు తెలుస్తోంది. ఇదిలా ఉండగా, శిల్పా శెట్టి మరియు రాజ్ కుంద్రా ఈ ఆరోపణలపై ఇప్పటి వరకు ఎలాంటి అధికారిక ప్రకటన విడుదల చేయలేదు. గతంలోనూ రాజ్ కుంద్రా పలు వివాదాస్పద వ్యాపారాల్లో ఇరుక్కొనడం సినీ పరిశ్రమలో పెద్ద చర్చకేంద్రంగా మారిన సంగతి తెలిసిందే. ఈ కేసు దర్యాప్తులో ఏవేవి నిజాలు వెలుగులోకి వస్తాయో చూడాలి. అయితే పెట్టుబడిదారుల నమ్మకాన్ని దుర్వినియోగం చేసిన ఘటనగా ఈ వివాదం భావించబడుతోంది.