నటి, పాపులర్ యాంకర్ అనసూయ భరద్వాజ్కు సోషల్ మీడియాలో ట్రోలింగ్ కొత్తేమీ కాకపోయినా, తాజాగా హోలీ వేడుకల్లో జరిగిన ఒక సంఘటన ఆమెను తీవ్రంగా కలిచివేసింది. దీనిపై ఆమె తనదైన శైలిలో స్పందిస్తూ ఇన్స్టాగ్రామ్ వేదికగా చేసిన పోస్ట్ ఇప్పుడు హాట్ టాపిక్గా మారింది. హైదరాబాద్లో జరిగిన హోలీ సంబరాల్లో పాల్గొన్న అనసూయకు కొందరు ఆకతాయిల వల్ల చేదు అనుభవం ఎదురైంది. ఆమె స్టేజీపై మాట్లాడుతుండగా, కింద ఉన్న కొందరు యువకులు కావాలనే ఆమెను రెచ్చగొట్టేలా ‘ఆంటీ ఆంటీ’ అంటూ కేకలు వేశారు. గతంలోనే తనను అలా పిలవడం ఇష్టం లేదని ఆమె బహిరంగంగా చెప్పినప్పటికీ, అదే పదాన్ని వాడుతూ ఆమెను హేళన చేయడం ఇప్పుడు వివాదాస్పదమైంది. దీనికి సంబంధించిన వీడియోలు నెట్టింట వైరల్ అవ్వడం, వాటిని చూసి చాలామంది వినోదం పొందడంపై అనసూయ తీవ్ర అసహనం వ్యక్తం చేశారు. ఇతరుల ఇబ్బందిలో ఆనందాన్ని వెతికే సానుభూతి లేని మనస్తత్వాలను చూసి సమాజం సిగ్గుపడాలని ఆమె మండిపడ్డారు.
ఈ ఘటనపై ఇన్స్టాలో సుదీర్ఘ పోస్ట్ పెట్టిన అనసూయ.. వయస్సును బట్టి హేళన చేయడం (Age Shaming), లింగ వివక్ష చూపడం వంటి క్రూరమైన ధోరణులపై ధ్వజమెత్తారు. “స్త్రీ ద్వేషం, ఒకరిని కించపరచడం వంటివి మన సమాజంలో చాలా సులభంగా మారిపోతున్నాయి. ఒకరి బాధను చూసి నవ్వుకోవడం హాస్యమని భ్రమపడుతున్నారు” అని ఆమె పేర్కొన్నారు. ఇలాంటి వాటిని చూసినప్పుడు ‘మనకెందుకులే’ అని మౌనంగా ఉంటే, భవిష్యత్తులో ఇవి మరీ సాధారణ విషయాలుగా మారిపోతాయని ఆమె హెచ్చరించారు. అన్యాయాన్ని ప్రశ్నించే వారిని టార్గెట్ చేయడం మానేసి, తప్పు చేసే వారిని నిలదీసే రోజు కోసం తాను ఎదురుచూస్తున్నానని ఆమె ఘాటుగా స్పందించారు.
ఎన్ని విమర్శలు వచ్చినా, ఎన్ని ట్రోల్స్ ఎదురైనా తన వ్యక్తిత్వాన్ని వదులుకోనని అనసూయ తేల్చిచెప్పారు. తన కష్టంతో, ప్రతిభతో ఈ స్థాయికి చేరుకున్నానని.. తనను విమర్శించే వారికి తన ఆత్మవిశ్వాసాన్ని తగ్గించే హక్కు లేదని స్పష్టం చేశారు. ఇప్పటికే పలుమార్లు ఇలాంటి బాడీ షేమింగ్, ఏజ్ షేమింగ్ చేసే వారిపై ఆమె సైబర్ పోలీసులకు ఫిర్యాదు చేసిన సంగతి తెలిసిందే. తాజాగా జరిగిన హోలీ ఇన్సిడెంట్ విషయంలో కూడా ఆమె వెనక్కి తగ్గకుండా, తనను గౌరవించని వారిపై పోరాటం కొనసాగిస్తానని హింట్ ఇచ్చారు. అనసూయ చేసిన ఈ పోస్ట్కు పలువురు నెటిజన్లు మరియు సెలబ్రిటీలు మద్దతుగా నిలుస్తుండటం విశేషం.