. పరిపూర్ణత కంటే స్థిరత్వం ముఖ్యం
. ఆరోగ్యం, దయ, సానుకూలతతో కొత్త సంవత్సరం
Ananya Pandey: నూతన సంవత్సర తీర్మానాలపై ఉండే సాధారణ హడావుడికి భిన్నంగా అనన్య పాండే ఒక నిశ్శబ్దమైన అర్థవంతమైన దారిని ఎంచుకుంది. “కొత్త సంవత్సరం కొత్త నేను” అనే ఆలోచన చాలామందిలో ఒత్తిడిని పెంచుతుందని ఆమె స్పష్టంగా చెబుతోంది. అందుకే ఈసారి తన నిర్ణయాలు ఆచరణలో పెట్టగలిగేవిగా వాస్తవానికి దగ్గరగా ఉండాలని అనన్య భావిస్తోంది. తాజాగా ఆమె షేర్ చేసిన ఇన్స్టాగ్రామ్ రీల్లో అద్దం ముందు నిలబడి తనతో తానే మాట్లాడుకుంటూ ఈ విషయాన్ని చాలా సహజంగా వెల్లడించింది. పెద్ద లక్ష్యాలు పెట్టుకుని మధ్యలో వదిలేయడం కంటే రోజూ పాటించగల చిన్న మార్పులే నిజమైన విజయానికి దారి తీస్తాయని ఆమె నమ్మకం.
కాలం ఎంత వేగంగా మారిపోతుందో సంవత్సరాంతం ఎలా కళ్లముందే జారిపోతుందో గుర్తు చేస్తూ అనన్య తన ఆలోచనలను పంచుకుంది. నూతన సంవత్సరంతో పాటు వచ్చే అంచనాలు స్వయంగా మనపై మనమే పెట్టుకునే ఒత్తిడి అవసరం లేదని ఆమె అభిప్రాయం. అందుకే ఈసారి అసాధ్యమైన లక్ష్యాల వెనక పరిగెత్తకుండా స్థిరత్వాన్ని ప్రధానంగా చేసుకుంది. మంచి నిద్ర, రోజంతా శరీరం హైడ్రేటెడ్గా ఉంచుకోవడం, క్రమం తప్పకుండా వ్యాయామం చేయడం వంటి సాధారణ అలవాట్లే ఆమె కొత్త సంవత్సరానికి పునాది. పర్ఫెక్ట్గా ఉండాల్సిన అవసరం లేదు క్రమంగా ముందుకు వెళ్లడమే ముఖ్యం అన్న సందేశం ఈ రీల్ అంతటా కనిపిస్తుంది. ఇది ఎంతోమందికి రిలీఫ్ ఇచ్చే ఆలోచనగా మారింది.
తన ఉదయపు దినచర్యలో భాగమైన ఒక చిన్న ప్రత్యేకమైన అలవాటును కూడా అనన్య వెల్లడించింది. రోజును కొన్ని కాలిఫోర్నియా బాదంపప్పులతో ప్రారంభించడం ఆమెకు అలవాటు. సహజ శక్తిని అందించే ఈ బాదంపప్పులు రోజంతా ఉత్సాహంగా ఉండేందుకు సహాయపడతాయని ఆమె చెబుతోంది. అంతేకాదు వాటిలో ఉండే ఆరోగ్యకరమైన కొవ్వులు, విటమిన్–E చర్మ ఆరోగ్యానికి మేలు చేస్తాయని యాంటీ–ఏజింగ్ లక్షణాలు కూడా ఉంటాయని అనన్య పేర్కొంది. ఈ చిన్న అలవాటు ఆమె ఆరోగ్యంపై పెట్టే శ్రద్ధకు నిదర్శనం అని చెప్పవచ్చు.