America: భారతదేశంపై ప్రస్తుతం అమెరికా (America) 50 శాతం టారిఫ్ (సుంకం) విధిస్తోంది. ఇందులో 25 శాతం బేస్ టారిఫ్ కాకుండా, రష్యా నుండి చౌకగా చమురు కొనుగోలు చేసినందుకు శిక్షగా అదనంగా 25 శాతం పెనాల్టీ విధించబడింది. ఈ నేపథ్యంలో న్యూఢిల్లీ ఇరాన్, వెనిజులా నుండి చమురు దిగుమతి చేసుకోవడానికి అనుమతి ఇస్తే మాస్కో నుండి చమురు కొనుగోలును ఆపివేస్తామని భారతదేశం అమెరికాకు తెలిపింది.
ఉక్రెయిన్ యుద్ధం కారణంగా అంతర్జాతీయ ఆంక్షలను ఎదుర్కొంటున్న రష్యా చౌకగా చమురును విక్రయించడం ప్రారంభించింది. భారతదేశం తన అవసరాలకు దాదాపు 90 శాతం చమురును దిగుమతి చేసుకుంటుంది. ఈ సందర్భంలో రష్యా నుండి చౌక ధరలకు చమురు కొనుగోలు చేయడం భారతదేశానికి దిగుమతి బిల్లును గణనీయంగా తగ్గించడంలో సహాయపడింది.
Also Read: Election Schedule: రేపు స్థానిక సంస్థల ఎన్నికల షెడ్యూల్ విడుదల?
అమెరికా ముందు భారత్ పెట్టిన షరతు
భారతదేశానికి ఇదే విధమైన చౌక చమురు ఇరాన్, వెనిజులా నుండి కూడా లభించే అవకాశం ఉంది. బ్లూమ్బర్గ్ నివేదిక ప్రకారం.. ఈ వారం అమెరికా పర్యటన సందర్భంగా భారత అధికారులు చమురు దిగుమతి సమస్యపై ట్రంప్ ప్రభుత్వానికి తమ వాదనను గట్టిగా వినిపించారు. వారు తమ సూచనలో రష్యా నుండి చమురు కొనుగోలును తగ్గించడానికి భారతీయ రిఫైనరీలకు ఇరాన్- వెనిజులా నుండి చమురు దిగుమతి చేసుకోవడానికి వాషింగ్టన్ నుండి అనుమతి అవసరమని తెలిపారు. ఎందుకంటే ప్రస్తుతం ఈ రెండు దేశాలపై అంతర్జాతీయ ఆంక్షలు ఉన్నాయి.
భారతదేశం దూకుడు వైఖరి
వాషింగ్టన్ న్యూఢిల్లీపై 50 శాతం భారీ టారిఫ్ను విధించిన సమయంలోనే భారత అధికారులు అమెరికాలో పర్యటించడం గమనార్హం. పెనాల్టీ ఉన్నప్పటికీ భారతదేశం ఇప్పటికీ రష్యా నుండి చౌక చమురు కొనుగోలును కొనసాగిస్తోంది. న్యూయార్క్ పర్యటన సందర్భంగా కేంద్ర వాణిజ్య మంత్రి పీయూష్ గోయల్ భారతదేశం అమెరికా నుండి చమురు, గ్యాస్ కొనుగోలును పెంచాలని చూస్తోందని సంకేతాలు ఇచ్చారు. తమ ఇంధన భద్రతా లక్ష్యాలలో అమెరికా పెద్ద సహకారం అందిస్తుందని ఆయన అన్నారు. 2022లో ఉక్రెయిన్- రష్యా మధ్య యుద్ధం ప్రారంభమైనప్పటి నుండి భారతదేశం మాస్కో నుండి ముడి చమురు కొనుగోలును విపరీతంగా పెంచింది.