ICICI Bank : ఇండియాలో పెద్ద ఎత్తున సేవింగ్స్ ఖాతాల వినియోగదారులందరూ ఆగస్టు 2025 నుండి గమనించవలసిన విషయంలో ICICI బ్యాంక్ అనేక కీలక మార్పులు చేసింది. ఈ మార్పులు ముఖ్యంగా మినిమం బ్యాలెన్స్, ఏటీఎం ఛార్జీలు, నగదు డిపాజిట్, నగదు ఉపసంహరణ లావాదేవీలపై ప్రభావం చూపుతాయి. బ్యాంకు ఈ కొత్త విధానాలను 1 ఆగస్టు 2025 నుంచి అమల్లోకి తీసుకువచ్చింది. ఈ మార్పులు ఖాతాదారులపై భారీ ప్రభావాన్ని కలిగించనున్నాయి.
మినిమం బ్యాలెన్స్ పెంపు -కొత్త ఛార్జీలు
ICICI బ్యాంక్ సేవింగ్స్ ఖాతాల్లో కనీస బ్యాలెన్స్ పెంచింది. ఇది ఖాతాదారులకు కొత్త ఆర్థిక భారముగా మారబోతోంది. అలాగే, ఏటీఎం ఉపయోగంపై, నగదు లావాదేవీలపై కూడా బ్యాంకు కొత్త ఛార్జీలను విధించింది. ఈ మార్పుల వల్ల ఖాతాదారులు ఖాతాలో నిర్దేశించిన మినిమం బ్యాలెన్స్ నిలుపుకోకపోతే, అదనపు ఫీజులు చెల్లించాల్సి వస్తుంది.
Bangladesh : బంగ్లాదేశ్‌తో వాణిజ్య ఉద్రిక్తతలు తీవ్రం..భారత్ కీలక నిర్ణయం
నగదు డిపాజిట్, ఉపసంహరణపై కొత్త పరిమితులు
బ్యాంకు ప్రతినెలా 3 నగదు లావాదేవీల వరకు మాత్రమే ఉచితం ఇస్తుంది. ఆ తర్వాత ప్రతి లావాదేవీకి రూ.150 ఫీజు వసూలు చేయబడుతుంది. నెలలో రూ.1 లక్ష వరకు నగదు డిపాజిట్ లేదా ఉపసంహరణ ఉచితం. ఈ పరిమితి దాటిన ప్రతి 1000 రూపాయలపై రూ.3.5 లేదా రూ.150 (ఏది ఎక్కువైతే) ఫీజు విధించబడుతుంది. అలాగే, ఒకే లావాదేవీకి ఉచిత పరిమితి, విలువ పరిమితి రెండూ దాటితే, ఎక్కువ ఫీజు వర్తిస్తుంది. మరోవైపు, థర్డ్ పార్టీ నగదు ఉపసంహరణ పరిమితి ఒక్క లావాదేవీకి రూ.25,000గా నిర్ణయించబడింది, ఇది అన్ని పొదుపు ఖాతాలకు వర్తిస్తుంది.
ఏటీఎం వాడకంపై కొత్త ఛార్జీలు
మెట్రో నగరాల్లోని (ముంబై, ఢిల్లీ, చెన్నై, కోల్‌కతా, బెంగళూరు, హైదరాబాద్) నాన్-ICICI బ్యాంక్ ATMలలో నెలకు 3 ఉచిత లావాదేవీలు మాత్రమే ఉన్నాయి. ఈ పరిమితిని దాటిన తర్వాత ప్రతి ఆర్థిక లావాదేవీపై రూ.23, ఆర్థికేతర లావాదేవీపై రూ.8.5 ఛార్జీ వసూలు చేయబడుతుంది. ఇతర ప్రాంతాల్లో నెలకు 5 ఉచిత లావాదేవీలు అందుబాటులో ఉంటాయి. విదేశాలలో ఏటీఎం ఉపసంహరణలపై ప్రతి లావాదేవీకి రూ.125 ఛార్జీతో పాటు 3.5% కరెన్సీ మార్పిడి ఫీజు విధించబడుతుంది. ఆర్థికేతర లావాదేవీలకు ప్రతి లావాదేవీకి రూ.25 వసూలు చేస్తారు. ICICI బ్యాంక్ ATMలలో నెలకు 5 ఆర్థిక లావాదేవీలు ఉచితమే ఉంటాయి. వాటి తర్వాత ప్రతి ఆర్థిక లావాదేవీకి రూ.23 ఫీజు విధించబడుతుంది. అయితే బ్యాలెన్స్ చెక్, మినీ స్టేట్‌మెంట్, పిన్ మార్చడం వంటి ఆర్థికేతర సేవలు ఉచితంగా ఉంటాయి.
పనివేళలు కాని సమయంలో నగదు డిపాజిట్ ఛార్జీ
సాయంత్రం 4:30 నుంచి ఉదయం 9 గంటల మధ్య లేదా బ్యాంకు సెలవు రోజులలో నగదు డిపాజిట్ చేస్తే, ఒక లావాదేవీకి రూ.10,000 కన్నా ఎక్కువ మొత్తం ఉంటే అదనంగా రూ.50 ఫీజు వసూలు చేయబడుతుంది. ఇది నగదు లావాదేవీ ఛార్జీలకు అదనంగా ఉంటుంది.
ఇతర బ్యాంకింగ్ సేవలపై ఫీజులు
డిమాండ్ డ్రాఫ్ట్ (DD): ప్రతి 1000 రూపాయలకు రూ.2, కనీసం రూ.50, గరిష్టంగా రూ.15,000 ఫీజు.
డెబిట్ కార్డు వార్షిక రుసుము: సాధారణంగా రూ.300, గ్రామీణ ప్రాంతాల్లో రూ.150.
కార్డు రిప్లేస్‌మెంట్: రూ.300.
SMS అలర్ట్స్: ఒక్కో SMSకి 15 పైసలు, త్రైమాసికంలో గరిష్టం రూ.100.
RTGS, స్టేట్‌మెంట్ ఫీజులు
బ్రాంచ్ ద్వారా RTGS: రూ.2 లక్షల నుంచి 5 లక్షల వరకు లావాదేవీలకు రూ.20; 5 లక్షల పైగా రూ.45.
బ్రాంచ్ లావాదేవీలు: రూ.10,000 వరకు రూ.2.25, 10,001 నుంచి లక్ష వరకు రూ.4.75, లక్ష నుంచి 2 లక్షల వరకు రూ.14.75, 2 లక్షల నుంచి 10 లక్షల వరకు రూ.24.75.
నెలవారీ స్టేట్‌మెంట్ (బ్రాంచ్ లేదా ఫోన్ బ్యాంకింగ్ ద్వారా): రూ.100. ATM, iMobile, ఇంటర్నెట్ బ్యాంకింగ్ ద్వారా స్టేట్‌మెంట్ ఉచితం.
జీఎస్టీ చెల్లింపులు : ICICI బ్యాంకు నిర్ధేశించిన అన్ని ఫీజులు, ఛార్జీలపై జీఎస్టీ చెల్లించాల్సి ఉంటుంది.
ఈ మార్పులతో ICICI బ్యాంక్ ఖాతాదారులకు కొత్త ఆర్థిక భారాలు పెరిగే అవకాశముంది. అందువల్ల ఖాతాదారులు తమ ఖాతాల నిర్వహణపై మరింత జాగ్రత్త పడాలి. బ్యాంకు విధించిన కొత్త నిబంధనలు, ఛార్జీలను సమగ్రమైన వివరాలతో తెలుసుకుని, అవసరమైన సవరణలు చేపట్టుకోవడం అత్యంత అవసరం.