GST 2.0: ఫైనాన్స్ మినిస్టర్ నిర్మలా సీతారామన్ బుధవారం రాత్రి ‘నెక్స్ట్ జనరేషన్’ జీఎస్టీ (GST 2.0) సంస్కరణలను ప్రకటించారు. ఇది దేశంలోని సాధారణ ప్రజలకు పెద్ద ఉపశమనాన్నిచ్చింది. అయితే పాన్ మసాలా, సిగరెట్లు, గుట్కా ఉపయోగించేవారు ఇప్పుడు మునపటి కంటే ఎక్కువ డబ్బు ఖర్చు చేయాల్సి ఉంటుంది.
GST 2.0 కింద పన్ను నిర్మాణాన్ని మారుస్తూ 5 శాతం, 18 శాతం రెండు పన్ను స్లాబ్‌లను ఆమోదించారు. లగ్జరీ వస్తువులు, సిన్ గూడ్స్‌పై 40 శాతం పన్ను విధించే ప్రకటన కూడా జారీ చేయబడింది. ఈ సిన్ గూడ్స్ విభాగంలో సిగరెట్లు, పొగాకు, గుట్కా, పాన్ మసాలా, పొగాకు నుండి తయారు చేయబడిన ఇతర ఉత్పత్తులు వస్తాయి. అదేవిధంగా లగ్జరీ కార్లు, చక్కెర పానీయాలు, ఫాస్ట్ ఫుడ్‌పై కూడా 40 శాతం GST వసూలు చేయబడుతుంది.
కాంపైన్సేషన్ సెస్ రద్దు
“కాంపైన్సేషన్ సెస్ ను రద్దు చేయాలని నిర్ణయం తీసుకున్నారు. ఇప్పుడు అది GSTలో కలుపబడుతుంది. తద్వారా పన్ను ప్రభావం ఎక్కువ వస్తువులపై ఉంటుంది” అని ఆర్థిక మంత్రిత్వ శాఖ పేర్కొంది. కాంపైన్సేషన్ సెస్ అనేది లగ్జరీ, సిన్ ఐటమ్స్‌పై విధించే ఒక రకమైన పన్ను. GST వ్యవస్థ అమలులోకి వచ్చినప్పుడు రాష్ట్రాల ఆదాయానికి నష్టం వాటిల్లుతుంది. ఆ నష్టాన్ని పూరించడానికి 2017లో దీన్ని ప్రారంభించారు. మొదట దీన్ని 2022 వరకు మాత్రమే అమలు చేయాలని యోచించారు. కానీ కరోనా మహమ్మారి తర్వాత దీన్ని 2026 వరకు అమలు చేయాలని నిర్ణయం తీసుకున్నారు. నిజానికి కోవిడ్-19 సమయంలో రాష్ట్రాలకు సహాయం చేయడానికి కేంద్ర ప్రభుత్వం రూ. 2.69 లక్షల కోట్ల అప్పు తీసుకుంది. ఈ అప్పును తీర్చడానికి కాంపైన్సేషన్ సెస్ గడువు పెంచబడింది.
Also Read: GST 2.0 : సామాన్యులకు భారీ ఊరట.. 18% జీఎస్టీలోకి వచ్చేవి ఇవే..!!
కొత్త GST రేట్ల తర్వాత పాన్ మసాలా, సిగరెట్లు, గుట్కా, పొగాకు వంటి హానికరమైన ఉత్పత్తులపై 40 శాతం GST వర్తిస్తుంది. ఇది ఇప్పుడు ఎక్స్-ఫ్యాక్టరీ ధరలకు బదులుగా రిటైల్ ధరలపై విధించబడుతుంది. అంటే ఒక సిగరెట్ ప్యాకేజీ గతంలో రూ. 256కు లభించేది అయితే కొత్త పన్ను రేటుతో ఇప్పుడు అది రూ. 280 కు లభిస్తుంది. అంటే నేరుగా రూ. 24 ఎక్కువ చెల్లించాలి.
40 శాతం GST స్లాబ్ కింద వచ్చే వస్తువులు
- పాన్ మసాలా
- సిగరెట్లు
- గుట్కా
- పొగాకు
- అనిర్మిత పొగాకు- పొగాకు వ్యర్థం [పొగాకు ఆకుల కాకుండా]
- సిగర్, చురుట్, పొగాకు లేదా పొగాకు ప్రత్యామ్నాయాలున్న సిగారిల్లో
- గాలి నింపిన చక్కెర పానీయాలు/శీతల పానీయాలు
- కార్బోనేటెడ్ పానీయాలు
- పండ్ల పానీయాలు లేదా పండ్ల రసాలున్న కార్బోనేటెడ్ పానీయాలు
- ఆన్‌లైన్ జూదం లేదా గేమింగ్
- కెఫిన్ గల పానీయాలు