Gold బంగారం కొనుగోలు చేయాలనుకునే వారికి మళ్లీ శుభవార్త అందింది. గోల్డ్, సిల్వర్ రేట్లు మళ్లీ వరుసగా దిగొస్తున్నాయి. ఇవాళ కూడా ధరలు దిగొచ్చాయి. వరుసగా రెండో రోజు రేట్లు తగ్గాయని చెప్పొచ్చు. ఇంటర్నేషనల్ మార్కెట్లో మాత్రం మరోసారి బంగారం, వెండి ధరలు ఎగబాకాయి. ఈ ప్రభావం ఉదయం 10 గంటల తర్వాత కనిపిస్తుంది. ప్రస్తుతం ఎక్కడ గోల్డ్, సిల్వర్ రేట్లు ఎలా ఉన్నాయనేది చూద్దాం.
పసిడి ప్రియులకు శుభవార్త. బంగారం ధర మళ్లీ పతనమైంది. వరుసగా రెండో రోజు రేట్లు దిగొచ్చాయి. దేశీయంగా దిగొచ్చినా.. ఇంటర్నేషనల్ మార్కెట్లో మాత్రం ధరలు పెరిగాయి. దేశీయంగా హైదరాబాద్ నగరంలో చూస్తే ప్రస్తుతం 22 క్యారెట్ల గోల్డ్ రేటు రూ. 650 తగ్గగా తులం ప్రస్తుతం రూ. 1,40,900 వద్ద ఉంది. దీనికి ముందటి రోజు కూడా బంగారం ధర రూ. 4600 తగ్గుముఖం పట్టింది. ఇదిలా ఉండగా.. 24 క్యారెట్ల స్వచ్ఛమైన బంగారం ధర విషయానికి వస్తే ఇది ఇవాళ రూ. 710 తగ్గడంతో ప్రస్తుతం 10 గ్రాములకు హైదరాబాద్ నగరంలో రూ. 1,53,710 వద్ద ఉంది. ఇది కిందటి రోజు రూ. 5020 తగ్గింది.
బంగారం ధరలు ఆల్ టైమ్ హై చూస్తే జనవరి 29న 22 క్యారెట్ల పసిడి ధర రూ. 1,63,950 వద్ద ఉండగా.. అక్కడి నుంచి ఏకంగా రూ. 23,050 దిగొచ్చింది. 24 క్యారెట్ల పుత్తడి ధర అదే జనవరి 29న రూ. 1,78,850 వద్ద జీవన కాల గరిష్ఠాల వద్ద ఉండగా.. అక్కడి నుంచి రూ. 25,140 తగ్గడంతో ప్రస్తుతం రూ. 1,53,710 కు చేరింది.
బంగారం ధరల బాటలోనే వెండి రేట్లు కూడా ఇవాళ దిగొచ్చాయి. ప్రస్తుతం హైదరాబాద్ నగరంలో కిలో వెండి ధర రూ. 20 వేలు తగ్గగా ప్రస్తుతం కేజీకి రూ. 2.80 లక్షల వద్ద ఉంది. దీనికి ముందు వరుసగా ధర దిగొచ్చింది. ముందటి రోజు రూ. 20 వేలు తగ్గగా.. దానికి ముందు రూ. 20 వేలు పెరిగింది. అంతకుముందు ఇక వరుసగా రూ. 20 వేలు, రూ. 85 వేలు, రూ. 20 వేలు ఇలా 4 రోజుల వ్యవధిలోనే రూ. 1.25 లక్షల మేర ధర తగ్గింది. ఈ క్రమంలోనే జనవరి 29న రూ. 4.25 లక్షల వద్ద ఆల్ టైమ్ గరిష్ఠాల వద్ద ఉండగా.. అక్కడి నుంచి చూస్తే ఇప్పుడు రూ. 1.45 లక్షలు తగ్గిందని చెప్పొచ్చు.
ఇంటర్నేషనల్ మార్కెట్లో మాత్రం బంగారం, వెండి ధరలు మళ్లీ కనిష్ఠాల నుంచి భారీగా పెరిగాయి. స్పాట్ గోల్డ్ రేటు ఔన్సుకు కిందటి రోజు ఒక దశలో 4,600 డాలర్ల స్థాయిలో ఉండగా.. మళ్లీ ఇది 4,965 డాలర్ల స్థాయికి ఎగబాకింది. దాదాపు 300 డాలర్ల వరకు రాత్రికి రాత్రే పెరిగిందని చెప్పొచ్చు. శనివారం ఉదయం 10 గంటలకు ఈ ప్రభావం దేశీయంగా కూడా కనిపిస్తుంది. అంటే ఇక్కడ కూడా రేట్లు భారీగానే పెరుగుతాయని అర్థం చేసుకోవాలి. ఇక సిల్వర్ రేటు ఔన్సుకు కిందటి రోజు ఉదయం ఒక దశలో 64 డాలర్ల స్థాయికి పడిపోగా.. మళ్లీ ఇప్పుడు 77.88 డాలర్ల మార్కుకు చేరింది. 20 శాతానికిపైగా పెరిగిందన్నమాట. డాలరుతో పోలిస్తే రూపాయి మారకం విలువ ప్రస్తుతం రూ. 90.67 వద్ద ఉంది.