వివాహిత స్త్రీ ద‌గ్గ‌ర ఎంత బంగారం ఉండొచ్చు?

Gold Storage: ఇంట్లో ఎంత బంగారం ఉంచుకోవచ్చు? ఆదాయపు పన్ను శాఖ దాడులు జరిగినప్పుడు ఎన్ని గ్రాముల వరకు బంగారాన్ని జప్తు చేయరు? బంగారం ధరలు పెరుగుతున్న తరుణంలో కొనుగోలు చేసే ముందు ఈ నియమాలను మీరు ఖచ్చితంగా తెలుసుకోవాలి. మే 1994లో CBDT (సెంట్రల్ బోర్డ్ ఆఫ్ డైరెక్ట్ టాక్సెస్) బంగారానికి సంబంధించి ఒక సర్క్యులర్‌ను జారీ చేసింది. దీని ప్రకారం.. సోదాల సమయంలో ఆదాయపు పన్ను అధికారులు ఒక నిర్దిష్ట పరిమితి వరకు ఉన్న బంగారు ఆభరణాలను స్వాధీనం చేసుకోకూడదని ఆదేశాలు ఉన్నాయి.

భారతదేశంలో బంగారం కేవలం పెట్టుబడి మాత్రమే కాదు.. అది ఒక సంప్రదాయం, భద్రతకు చిహ్నం. పెళ్లిళ్ల నుండి పొదుపు వరకు ప్రతి ఇంట్లో బంగారం ఉంటుంది. అయితే ఇంట్లో బంగారం ఉంచుకోవడానికి కూడా కొన్ని చట్టపరమైన పరిమితులు, నిబంధనలు ఉన్నాయని మీకు తెలుసా?

బంగారం ఉంచుకోవడానికి చట్టపరమైన పరిమితి ఏమిటి?

భారతదేశంలో సాధారణ పౌరులు ఇంట్లో బంగారం ఉంచుకోవడానికి గరిష్ట పరిమితి అంటూ ఏమీ లేదు. కానీ ఆదాయపు పన్ను సోదాలు జరిగినప్పుడు ఈ క్రింది పరిమితి వరకు ఉన్న బంగారానికి ఎటువంటి ఆధారాలు చూపాల్సిన అవసరం లేదు.

Also Read: రైతుల‌కు శుభ‌వార్త చెప్పిన కేంద్రం!

ప్రభుత్వ మార్గదర్శకాల ప్రకారం

• వివాహిత స్త్రీ: 500 గ్రాముల వరకు
• అవివాహిత స్త్రీ: 250 గ్రాముల వరకు
• పురుషుడు: 100 గ్రాముల వరకు

ఈ పరిమితి లోపు ఉన్న బంగారాన్ని సాధారణంగా అధికారులు ప్రశ్నించరు.అది సక్రమ మార్గంలో పొందినంత కాలం ఎటువంటి ఇబ్బంది ఉండదు.

ఎప్పుడు సమాధానం చెప్పాల్సి ఉంటుంది?

ఒకవేళ మీ దగ్గర పైన పేర్కొన్న పరిమితి కంటే ఎక్కువ బంగారం ఉంటే కంగారు పడాల్సిన అవసరం లేదు. కానీ ఆ అదనపు బంగారానికి సంబంధించిన మూలాధారాన్ని మీరు నిరూపించాల్సి ఉంటుంది.

కొనుగోలు చేసిన బిల్లులు

వారసత్వంగా లేదా బహుమతిగా వచ్చినట్లు ఆధారాలు

మీ ఆదాయానికి అనుగుణంగా కొనుగోలు చేసిన వివరాలు

ఈ పత్రాలు లేకపోతే తనిఖీల సమయంలో ఇబ్బందులు ఎదురయ్యే అవకాశం ఉంది. ముఖ్యంగా ఆదాయపు పన్ను శాఖ విచారణలో.

ఆదాయపు పన్ను శాఖ ఏం చెబుతోంది?

ఆదాయపు పన్ను శాఖ ప్రకారం.. మీరు ప్రకటించిన ఆదాయం లేదా చట్టబద్ధమైన మార్గాల ద్వారా బంగారాన్ని కొనుగోలు చేసినట్లయితే దానిపై ఎటువంటి పన్ను లేదా జప్తు ముప్పు ఉండదు. అయితే లెక్క చూపని పెద్ద మొత్తంలో బంగారాన్ని కలిగి ఉంటే మాత్రం చర్యలు తీసుకుంటారు.

నియమాలను అర్థం చేసుకోవడం ఎందుకు ముఖ్యం?

బంగారం ధరలు పెరుగుతున్న నేపథ్యంలో పారదర్శకత చాలా ముఖ్యం. నిపుణుల అభిప్రాయం ప్రకారం.. సరైన పత్రాలను కలిగి ఉండటం వల్ల చట్టపరమైన చిక్కులు తగ్గడమే కాకుండా భవిష్యత్తులో ఆస్తి నిర్వహణ కూడా సులభం అవుతుంది.