గత వారం భారీగా పెరిగిన బంగారం ధరలు..ఇప్పుడు తగ్గుముఖం పడుతుండడం , అది కూడా పెళ్లిళ్ల సీజన్ లో తగ్గుతుండడం సామాన్య ప్రజలకు ఊపిరి పోసినట్లు అవుతుంది. ఈరోజు 24 క్యారెట్ల 10 గ్రాముల బంగారం ధర రూ.1,140 తగ్గి రూ.1,24,480 వద్దకు చేరగా, 22 క్యారెట్ల 10 గ్రాముల ధర రూ.1,050 తగ్గి రూ.1,14,100గా నమోదైంది. గత కొద్ది వారాలుగా బంగారం ధరలు అతి వేగంగా పెరిగి సాధారణ వినియోగదారులందరినీ ఆశ్చర్యపరిచాయి. దాంతో కొనుగోళ్లు తగ్గి, డిమాండ్లో కొంత స్థిరత్వం నెలకొంది. ఇప్పుడు ధరలు కొంచెం తగ్గడంతో వివాహాల సీజన్ను దృష్టిలో పెట్టుకుని ప్రజలు మళ్లీ బంగారం కొనుగోళ్లకు ముందుకువచ్చే అవకాశముంది. ఈ తగ్గుదల కొంతకాలం కొనసాగుతుందా, లేక తాత్కాలికమా అన్నది మార్కెట్ పరిస్థితులు నిర్ణయిస్తాయి.
మరోవైపు పెట్టుబడిదారుల కోణంలో బంగారం ధరల తగ్గుదల నిరాశ కలిగించే పరిణామంగా మారింది. ఇటీవల అంతర్జాతీయ బంగారం మార్కెట్లో డాలర్ బలపడటం, అమెరికా ఫెడ్ రిజర్వ్ వడ్డీ రేట్లపై జాగ్రత్త ధోరణి, అంతర్జాతీయ బాండ్ యీల్డ్స్ పెరగడం వంటి అంశాలు గోల్డ్ రేట్లను ప్రభావితం చేశాయి. పెట్టుబడిగా బంగారంపై ఆధారపడే ఇన్వెస్టర్లకు ఇది తాత్కాలిక ఆటుపోట్లకే కారణమని మార్కెట్ విశ్లేషకులు అంటున్నారు. ముఖ్యంగా సేఫ్ హావెన్గా భావించే బంగారంలో మార్పులు సాధారణమని, దీర్ఘకాలంలో మళ్లీ స్థిరంగా పెరుగుతుందని అంచనా.
ఇక వెండి ధరలు మాత్రం స్థిరంగా కొనసాగుతున్నాయి. కిలో వెండి ధర రూ.1,70,000 చుట్టూ ఉన్నట్లు ట్రేడింగ్ వర్గాలు వెల్లడించాయి. వెండి ధరలో పెద్దగా మార్పులు లేకపోవడం మార్కెట్లో సమతుల్యతని సూచిస్తుంది. వివిధ దేశాల ఆర్థిక పరిస్థితులు, మాన్యుఫ్యాక్చరింగ్ రంగంలోని డిమాండ్, గ్లోబల్ కరెన్సీ మార్పిడిలు ఇవన్నీ కలిపి ఈ ధరలపై ప్రభావం చూపుతున్నాయి. ప్రస్తుతం బంగారం ధరలు తగ్గడం సాధారణ వినియోగదారులకి శుభవార్త అయితే, దీర్ఘకాల పెట్టుబడిదారులకు మాత్రం జాగ్రత్తగా గమనించాల్సిన సంకేతమని నిపుణులు చెబుతున్నారు.