Rs 2,000 Notes: దేశవ్యాప్తంగా రూ. 2000 నోట్లు (Rs 2,000 Notes) మరోసారి చర్చనీయాంశమయ్యాయి. దాదాపు ఏడాదిన్నర క్రితం నోట్ల ఉపసంహరణ ప్రకటన చేసినప్పటికీ ఇంకా రూ. 5,817 కోట్ల విలువైన రూ. 2000 నోట్లు చలామణిలోకి తిరిగి రాలేదని భారతీయ రిజర్వ్ బ్యాంక్ (RBI) విడుదల చేసిన కొత్త గణాంకాలు వెల్లడించాయి. ఈ నోట్లు పూర్తిగా వ్యవస్థ నుండి అదృశ్యమయ్యాయని చాలా మంది భావిస్తున్న తరుణంలో ఈ విషయం బయటపడింది.
ఇటీవ‌ల విడుదల చేసిన ఒక ప్రకటనలో.. RBI ఒక కీలక విషయాన్ని తెలియజేసింది. మే 19, 2023న రూ. 2000 నోట్లను చలామణి నుండి ఉపసంహరిస్తున్నట్లు ప్రకటించినప్పుడు వాటి మొత్తం విలువ రూ. 3.56 లక్షల కోట్లుగా ఉండేది. ఇప్పుడు ఆ విలువ కేవలం రూ. 5,817 కోట్లకు తగ్గింది. అంటే RBI ప్రకారం 98.37% రూ. 2000 నోట్లు బ్యాంకింగ్ వ్యవస్థకు తిరిగి వచ్చాయి.
రూ. 2000 నోట్లు ఇంకా చెల్లుబాటు అవుతాయా?
రూ. 2000 నోట్లు ఇప్పటికీ చెల్లుబాటు అయ్యే కరెన్సీ అని, అంటే వాటిని ఏ లావాదేవీలోనైనా అంగీకరించవచ్చని RBI స్పష్టం చేసింది. అయితే వాటి ముద్రణను నిలిపివేశారు. బ్యాంకులు వాటిని తిరిగి జారీ చేయడం లేదు. మే 19, 2023 నుండి RBI 19 ప్రాంతీయ కార్యాలయాలలో ఈ నోట్లను డిపాజిట్ చేయడానికి లేదా మార్పిడి చేసుకోవడానికి అవకాశం ఉంటుందని కేంద్ర బ్యాంక్ తెలిపింది. అక్టోబర్ 9, 2023 నుండి ఈ సదుపాయం సామాన్య ప్రజలకు మరింత సులభతరం అయింది.
Also Read: Sunrisers Hyderabad: ఐపీఎల్‌ 2026 వేలానికి ముందు స‌న్‌రైజ‌ర్స్‌ నుండి స్టార్ బ్యాట‌ర్‌ విడుదల?
ప్రజలు ఇప్పుడు తమ రూ. 2000 నోట్లను ఇండియన్ పోస్ట్ (Indian Post) ద్వారా కూడా RBI ఏ కార్యాలయానికి అయినా పంపి, తమ బ్యాంకు ఖాతాలలో జమ చేసుకోవచ్చు. ఈ కార్యాలయాలు అహ్మదాబాద్, బెంగళూరు, బేలాపూర్, భోపాల్, భువనేశ్వర్, చండీగఢ్, చెన్నై, గువాహటి, హైదరాబాద్, జైపూర్, జమ్మూ, కాన్పూర్, కోల్‌కతా, లక్నో, ముంబై, నాగ్‌పూర్, న్యూఢిల్లీ, పాట్నా, తిరువనంతపురంలో ఉన్నాయి.
ఈ నోట్లు ఎక్కడ ఉండవచ్చు?
రూ. 2,000 నోట్ల ఉపసంహరణ స్థితిని ఎప్పటికప్పుడు అప్‌డేట్ చేస్తామని RBI తెలిపింది. నిపుణుల అభిప్రాయం ప్రకారం.. కొన్ని నోట్లు ఇప్పటికీ గ్రామీణ ప్రాంతాలలో లేదా నగదు ఆధారిత వ్యాపారాలలో ఉండిపోయి ఉండవచ్చు. కొందరు వ్యక్తులు వీటిని జ్ఞాపికలుగా (Souvenirs) లేదా సేకరణ వస్తువులుగా (Collectible) కూడా భద్రపరుచుకుంటూ ఉండవచ్చు.