BSNL has introduced a special “Bharat Connect 26” annual prepaid plan : ప్రభుత్వ రంగ టెలికాం దిగ్గజం బీఎస్ఎన్ఎల్ (BSNL) ప్రైవేట్ కంపెనీలకు గట్టి పోటీనిస్తూ కస్టమర్ల కోసం అదిరిపోయే వార్షిక ప్లాన్ను ప్రకటించింది. దేశ 77వ గణతంత్ర దినోత్సవాన్ని పురస్కరించుకుని ‘భారత్ కనెక్ట్ 26’ (Bharat Connect 26) పేరుతో ఒక ప్రత్యేక ఆఫర్ను అందుబాటులోకి తెచ్చింది. ప్రతి నెలా రీఛార్జ్ చేయించుకునే జంజాటం లేకుండా, ఏడాది పొడవునా నిరంతరాయంగా సేవలు పొందాలనుకునే వారికి ఇది ఒక అద్భుతమైన అవకాశం. ముఖ్యంగా ప్రైవేట్ టెలికాం సంస్థలైన జియో, ఎయిర్టెల్ తమ ప్లాన్ల ధరలను పెంచిన నేపథ్యంలో, బీఎస్ఎన్ఎల్ ఇంత తక్కువ ధరకు ఈ ఆఫర్ ప్రకటించడం విశేషం.
ఈ ప్లాన్ వివరాల్లోకి వెళితే, వినియోగదారులు రూ. 2626తో రీఛార్జ్ చేసుకుంటే పూర్తి 365 రోజుల వ్యాలిడిటీ లభిస్తుంది. ఈ ప్లాన్ ద్వారా ప్రతిరోజూ 2.6 జీబీ హై-స్పీడ్ డేటాను వాడుకోవచ్చు. డేటాతో పాటు ఏ నెట్వర్క్కైనా అపరిమిత ఉచిత కాల్స్ మాట్లాడుకోవచ్చు మరియు రోజుకు 100 ఎస్ఎంఎస్లు పంపుకోవచ్చు. అంటే నెలకు సుమారు రూ. 218 ఖర్చుతోనే రోజుకు 2.6 జీబీ డేటా మరియు అన్లిమిటెడ్ కాల్స్ లభిస్తున్నాయన్నమాట. ఇతర నెట్వర్క్ల వార్షిక ప్లాన్లతో పోలిస్తే ఇది చాలా చౌకైనది మరియు ఎక్కువ డేటాను అందిస్తున్న ప్లాన్గా నిలుస్తోంది.
అయితే, ఈ బంపర్ ఆఫర్ కేవలం పరిమిత కాలం మాత్రమే అందుబాటులో ఉంటుంది. ఫిబ్రవరి 24, 2026 వరకు మాత్రమే ఈ ప్లాన్తో రీఛార్జ్ చేసుకునే వెసులుబాటు ఉందని బీఎస్ఎన్ఎల్ స్పష్టం చేసింది. గణతంత్ర దినోత్సవ స్పెషల్ ప్లాన్ కాబట్టి కేవలం ఒక నెల రోజుల పాటు మాత్రమే ఈ విండోను తెరిచి ఉంచారు. ఒకేసారి పెద్ద మొత్తంలో చెల్లించి ఏడాది అంతా డేటా, కాల్స్ టెన్షన్ లేకుండా ఉండాలనుకునే వారికి ఫిబ్రవరి 24 లోపు రీఛార్జ్ చేసుకోవడం ఉత్తమం. మారుమూల ప్రాంతాల్లో కూడా నెట్వర్క్ విస్తరిస్తున్న తరుణంలో బీఎస్ఎన్ఎల్ నుంచి వచ్చిన ఈ నిర్ణయం కస్టమర్లను బాగా ఆకట్టుకుంటోంది.