SBI Notice: దేశంలోని అతిపెద్ద ప్రభుత్వ రంగ బ్యాంక్, స్టేట్ బ్యాంక్ ఆఫ్ ఇండియా తన వినియోగదారుల కోసం ఒక ముఖ్యమైన హెచ్చరికను జారీ చేసింది. యునైటెడ్ ఫోరమ్ ఆఫ్ బ్యాంక్ యూనియన్స్ జనవరి 26, 2026 అర్ధరాత్రి నుండి జనవరి 27, 2026 అర్ధరాత్రి వరకు దేశవ్యాప్త బ్యాంక్ సమ్మెకు పిలుపునిచ్చింది. అన్ని శనివారాల్లో సెలవుతో కూడిన వారానికి ఐదు రోజుల పని దినాలు, బ్యాంకింగ్ సేవలలో మెరుగుదలలను డిమాండ్ చేస్తూ ఈ సమ్మెను నిర్వహిస్తున్నారు.
తొమ్మిది ప్రధాన బ్యాంక్ ఉద్యోగుల, అధికారుల సంఘాల ఉమ్మడి వేదిక అయిన UFBU, ఇండియన్ బ్యాంక్స్ అసోసియేషన్ (IBA)తో జరిపిన చర్చలు విఫలం కావడంతో ఈ నిర్ణయం తీసుకుంది. ఈ సమ్మె ప్రభావం ప్రధానంగా జనవరి 27, 2026 (మంగళవారం) నాడు ఎక్కువగా ఉంటుంది. ఆ రోజు మెజారిటీ బ్యాంక్ శాఖలు మూతపడే అవకాశం ఉంది. దీనికి ముందు జనవరి 24 (నాల్గవ శనివారం), జనవరి 25 (ఆదివారం), జనవరి 26 (గణతంత్ర దినోత్సవం) ఇప్పటికే సెలవులు కావడంతో వరుసగా బ్యాంకులు మూతపడనున్నాయి.
Also Read: రాజకీయాల నుంచి క్రీడలను దూరంగా ఉంచలేం: మాజీ క్రికెటర్
వినియోగదారులు ఏం చేయాలి?
వరుసగా నాలుగు రోజుల పాటు (జనవరి 24 నుండి 27 వరకు) బ్యాంకింగ్ సేవలకు అంతరాయం కలగడం వల్ల నగదు విత్డ్రా, చెక్ క్లియరెన్స్, లోన్ ప్రాసెసింగ్, ఇతర బ్రాంచ్ ఆధారిత సేవలలో కస్టమర్లు ఇబ్బందులు ఎదుర్కోవచ్చు. సమ్మె సమయంలో అత్యవసర సేవలను కొనసాగించడానికి ప్రయత్నిస్తామని SBI తెలిపినప్పటికీ ఇబ్బందులు కలగకుండా వినియోగదారులు ముందుగానే సిద్ధంగా ఉండాలని సూచించింది.
SBI వినియోగదారులకు ఇచ్చిన సలహాలు
- నగదు అవసరాల కోసం ATM, ADWM (నగదు జమ చేసే యంత్రాలు)లను ఉపయోగించుకోండి.
- మీకు దగ్గరలోని కస్టమర్ సర్వీస్ పాయింట్స్ (CSP) సేవలను వినియోగించుకోండి.
- బ్యాంకింగ్ పనుల కోసం ఇంటర్నెట్ బ్యాంకింగ్, YONO యాప్, మొబైల్ బ్యాంకింగ్, UPI, ఇతర డిజిటల్ మార్గాలకు ప్రాధాన్యత ఇవ్వండి.
- సమ్మె కారణంగా కలిగే అసౌకర్యానికి విచారం వ్యక్తం చేస్తూ వినియోగదారులు సహకరించాలని, పరిస్థితిని అర్థం చేసుకోవాలని SBI కోరింది.