ప్రస్తుతం దేశీయ మార్కెట్లో ఎలక్ట్రిక్ వాహనాలకు ఉన్న క్రేజీ డిమాండ్ గురించి మనందరికీ తెలిసిందే. ఇంధన ధరలు ఆకాశానంటుతుండడంతో వాహన వినియోగదారులు ఎక్కువ శాతం మంది ఎలక్ట్రిక్ వాహనాల వైపు మొగ్గు చూపుతున్నారు. దాంతో రోజుకో కొత్త మోడల్ మార్కెట్లోకి విడుదల అవుతూనే ఉంది. ఇప్పటికే ఎన్నో రకాలు మార్కెట్లోకి విడుదలైన విషయం తెలిసిందే. ప్రస్తుతం తాజాగా మార్కెట్లో ఉన్న కొన్ని స్కూటర్లు వినియోగదారి దృష్టిని విపరీతంగా ఆకర్షిస్తున్నాయి. హరియాణాకు చెందిన ప్రముఖ ఈ-బైక్స్ సంస్థ జెలియో కొత్త స్కూటర్లను ఆవిష్కరించింది. ఈవా పేరుతో మూడు రకాల మోడళ్లను ఆవిష్కరించింది.
కేవలం రూ.56,051 నుంచి వీటి ధరలు ప్రారంభం అవుతున్నాయి. ఇకపోతే తాజాగా విడుదల చేసిన ఈ కొత్త స్కూటర్లకు సంబంధించిన ధరా ఫీచర్ల గురించి ఇప్పుడు మనం తెలుసుకుందాం.. హరియాణాకు చెందిన ఎలక్ట్రిక్ వెహికల్ స్టార్టప్ అయిన జెలియో ఇ బైక్స్ తన ఈవా ఇ-స్కూటర్ శ్రేణిని ప్రారంభించింది. తన పోర్ట్‌ ఫోలియోలో కొత్త ఉత్పత్తులను చేర్చింది. ఈవా, ఈవా ఈకో, ఈవా జెడ్ ఎక్స్ ప్లస్ అనే మూడు రకాల వేరియంట్లను మార్కెట్లోకి విడుదల చేసింది. వీటి ధరలు రూ. 56,051 నుంచి రూ. 90,500 గా ఉన్నాయి. ఈ ఈవా స్కూటర్ లో 60/72V బీఎల్ డీసీ మోటార్ ఏర్పాటు చేశారు. ఇది 180 కిలోల లోడింగ్ సామర్థ్యంతో 80 కిలోల బరువు ఉంటుంది. రెండు చివర్లలో డ్రమ్ బ్రేక్‌లు ఉన్నాయి. యాంటీ థెఫ్ట్ అలారం, రివర్స్ గేర్, పార్కింగ్ స్విచ్, ఆటో రిపేర్ స్విచ్, యూఎస్ బీ ఛార్జర్, డిజిటల్ డిస్‌ప్లే అదనపు ప్రత్యేకతలు కూడా ఉన్నాయి.
ఈ స్కూటర్లు బ్లూ, గ్రే, వైట్, బ్లాక్ రంగులలో లభించనున్నాయి. దీని రేంజ్ 55 నుంచి 100 కిలో మీటర్ల మధ్య ఉంటుంది. ఈవా ఈకో మోడల్ లో వెనుక డ్రమ్, ఫ్రంట్ డిస్క్ బ్రేక్ సెటప్‌ తో అమర్చారు. ఈవా స్కూటర్ మాదిరిగానే రివర్స్ గేర్, పార్కింగ్ స్విచ్, యూఎస్ బీ ఛార్జింగ్‌తో సహా అన్ని రకాల ఫీచర్లు ఏర్పాటు చేశారు. దీనిలో మూడు బ్యాటరీ ఎంపికలు ఉన్నాయి. ఈవా ఈకో రేంజ్ 50 నుంచి 100 కిలో మీటర్ల వరకూ ఉంటుంది. ఇకపోతే ఈవా జెడ్ ఎక్స్ ప్లస్ విషయానికి వస్తే.. ఈవా జెడ్ ఎక్స్ ప్లస్ లో కూడా పైన తెలిపిన రెండు స్కూటర్ల ఫీచర్లు ఉంటాయి. ఐదు విభిన్న బ్యాటరీ ప్యాక్‌లను ఎంపిక చేసుకోవచ్చు. కంపెనీ లెడ్ యాసిడ్, లిథియం అయాన్ బ్యాటరీలపై ఒక ఏడాది, లేదా పదివేల కిలోమీటర్ల వారంటీని అందిస్తోంది. ఇకపోతే వీటి ధరల విషయానికి వస్తే.. ఈవా స్కూటర్ ధర రూ. 56,051 గా ఉండగా, ఈవా ఈకో ధర రూ.58,551 గా ఉంది. ఇక ఈవా జెడ్ ఎక్స్ ప్లస్ ధర 61,851 గా ఉంది.