సెకండ్ హ్యాండ్ కారు కొంటున్నారా? అయితే జాగ్ర‌త్త‌!

Second-Hand Car: ఈ రోజుల్లో సెకండ్ హ్యాండ్ కార్లు కొనడం చాలా సులభమైపోయింది. తక్కువ బడ్జెట్‌లో మంచి వాహనం దొరుకుతుండటంతో చాలా మంది కొత్త కారు కంటే పాత కారు తీసుకోవడానికే మొగ్గు చూపుతున్నారు. మరికొందరు డ్రైవింగ్ నేర్చుకోవడానికి లేదా ప్రయోగాత్మకంగా పాత కార్లను కొంటారు. అయితే ఇక్కడ మీరు చేసే చిన్న పొరపాటు భారీ నష్టానికి దారితీయవచ్చు. కొన్నిసార్లు కారు బయటకి బాగున్నా, లోపల పెద్ద సమస్యలు దాగి ఉండవచ్చు. అందుకే మీరు పాత కారు కొనాలని ఆలోచిస్తుంటే ఈ క్రింది ముఖ్యమైన విషయాలను గమనించడం చాలా అవసరం.

కారు డాక్యుమెంట్లను తప్పక తనిఖీ చేయండి

పాత కారు కొనేటప్పుడు అన్నింటికంటే ముఖ్యమైన పని కాగితాలను తనిఖీ చేయడం. RC (రిజిస్ట్రేషన్ సర్టిఫికేట్), ఇన్సూరెన్స్, పొల్యూషన్ సర్టిఫికేట్, సర్వీస్ రికార్డ్స్ అన్నీ సరిగ్గా ఉండాలి. RCపై ఉన్న ఇంజిన్ నంబర్, ఛాసిస్ నంబర్ కారుతో మ్యాచ్ అవ్వాలి. ఒకవేళ కారుపై గతంలో లోన్ ఉంటే, బ్యాంకు నుండి NOC తప్పనిసరిగా తీసుకోవాలి. లేదంటే భవిష్యత్తులో చట్టపరమైన ఇబ్బందులు ఎదురవుతాయి.

యాక్సిడెంట్ హిస్టరీని విస్మరించవద్దు

కొన్నిసార్లు ప్రమాదానికి గురైన కార్లను బయటకి కొత్తవిగా కనిపించేలా రిపేర్ చేస్తారు. అందుకే బాడీ ప్యానెల్స్, పెయింట్, వెల్డింగ్‌ను జాగ్రత్తగా గమనించండి. తలుపులు లేదా బోనెట్ మధ్య ఉండే గ్యాప్‌లు సమానంగా లేకపోతే, అది గతంలో జరిగిన పెద్ద ప్రమాదానికి సంకేతం కావచ్చు. ఇటువంటి కార్లు భవిష్యత్తులో సేఫ్టీ, పర్ఫార్మెన్స్ పరంగా ఇబ్బంది కలిగిస్తాయి.

Also Read: సంజూ శాంసన్‌పై ప్రధాని మోదీ ప్రశంసలు!

ఇంజిన్ కండిషన్‌ను అర్థం చేసుకోండి

కారుకి ఇంజిన్ ప్రాణం లాంటిది. కారు స్టార్ట్ చేసినప్పుడు వచ్చే శబ్దం, వైబ్రేషన్, పొగపై దృష్టి పెట్టండి. ఇంజిన్ ఎక్కువగా శబ్దం చేస్తున్నా లేదా పొగ వస్తున్నా, అది భారీ రిపేర్‌కు సంకేతం కావచ్చు. పాత కారు కొనే ముందు ఎప్పుడూ ‘కోల్డ్ ఇంజిన్’ (చల్లగా ఉన్నప్పుడు) స్టార్ట్ చేసి చూడండి. లాంగ్ టెస్ట్ డ్రైవ్ తప్పక చేయండి.

ఓడోమీటర్ తనిఖీ ముఖ్యం

చాలామంది పాత కార్ల మైలేజీని తక్కువగా చూపించడానికి ఓడోమీటర్ (Odometer)తో ఛేదస్తం చేస్తుంటారు. కేవలం మీటర్ రీడింగ్‌ను మాత్రమే నమ్మకండి. కారు లోపల స్టీరింగ్, పెడల్స్, సీట్ల అరుగుదల చూస్తే కారు ఎంత వాడారో ఒక అంచనా వస్తుంది. సర్వీస్ రికార్డ్స్‌తో రీడింగ్‌ను సరిపోల్చుకోండి.

కారు వయస్సును తనిఖీ చేయండి

భారతదేశంలో కారు గడువు సాధారణంగా 15 ఏళ్లు. అందుకే కొనే ముందు మ్యాన్యుఫ్యాక్చరింగ్ డేట్ చూడండి. 15 ఏళ్లు పూర్తయితే మళ్లీ రిజిస్ట్రేషన్ చేయించడానికి చాలా ఖర్చు అవుతుంది. ముఖ్యంగా డీజిల్ కార్ల విషయంలో నిబంధనలు ఇంకా కఠినంగా ఉంటాయి.

సర్వీస్, స్పేర్ పార్ట్స్ లభ్యత

తక్కువ ధరకు వస్తుంది కదా అని ఏదో ఒక కారు కొనకండి. తర్వాత దాని విడిభాగాలు దొరకకపోయినా లేదా ఖరీదైనవి అయినా ఇబ్బంది పడాల్సి వస్తుంది. మీరు కొనే కారుకు దగ్గరలో సర్వీస్ సెంటర్ ఉందో లేదో, స్పేర్ పార్ట్స్ సులభంగా దొరుకుతాయో లేదో ముందే తెలుసుకోండి.

సరైన ధరకు బేరమాడండి

పాత కారు కొనేటప్పుడు తొందరపడకండి. ఆన్‌లైన్ ప్లాట్‌ఫారమ్‌లు, లోకల్ మార్కెట్‌లో అదే మోడల్ ధర ఎంత ఉందో అంచనా వేయండి. కారులో ఏవైనా లోపాలు ఉంటే వాటిని సాకుగా చూపి ధర తగ్గించమని అడగండి. తెలివిగా చేసే బేరం మీకు మంచి లాభాన్ని చేకూరుస్తుంది.

ఎంత పాత కారు తీసుకోవడం మంచిది?

సాధారణంగా కారు వయస్సు 15 ఏళ్లు ఉన్నప్పటికీ సెకండ్ హ్యాండ్ మార్కెట్‌లో 2 నుండి 5 ఏళ్ల పాత కారు తీసుకోవడం ఉత్తమమైన నిర్ణయం. ఈ వయస్సులో కారు ధర చాలా వరకు తగ్గుతుంది. కానీ క్వాలిటీ, పర్ఫార్మెన్స్ మాత్రం కొత్త కారులాగే బాగుంటాయి. కొన్నిసార్లు కంపెనీ వారంటీ కూడా మిగిలి ఉండే అవకాశం ఉంటుంది.