భారత మార్కెట్ లో పెట్రోల్, డీజిల్ కార్ల అమ్మకాలలో మారుతి సుజుకి అగ్రగామిగా ఉన్న విషయం మనందరికీ తెలిసిందే. అత్యధిక విక్రయాలు చేస్తున్న జాబితాలో టాప్ టెన్ లో ఈ కంపెనీకి సంబంధించిన కార్లు ఉంటాయని చెప్పవచ్చు. మార్కెట్లో కూడా మారుతి సుజుకి కార్లకు బాగా డిమాండ్ ఉంది. ఇకపోతే ఇటీవల కాలంలో ఎలక్ట్రిక్ కార్ల వినియోగం పెరిగిపోవడంతో మిగిలిన ఆటోమొబైల్ కంపెనీలు వరుసగా చాలా రకాల ఎలక్ట్రిక్ కార్లని విడుదల చేస్తుండగా మారుతి సుజుకి నుంచి ఇప్పటివరకు ఒక ఎలక్ట్రిక్ కారు కూడా మార్కెట్ లోకి విడుదల కాలేదు.
దీంతో మారుతి సుజుకి వినియోగదారులు ఎప్పుడెప్పుడు ఎలక్ట్రిక్ కారుని విడుదల చేస్తుందా అని ఎంతో ఆత్రుతగా ఎదురుచూస్తున్నారు. అయితే ఆ ఎదురు చూపులకు చెక్ పెడుతూ త్వరలోనే కొత్త ఈవీ కారును మార్కెట్లోకి విడుదల చేయబోతోంది. ఈ విషయాన్ని మారుతీ సుజుకీ ఇండియా ఎండీ అండ్ సీఈఓ హిసాషి టేకుచి తాజాగా సెప్టెంబర్ పదో తేదీన జరిగిన ఒక కార్యక్రమంలో తెలిపారు. 2030 నాటికి ఎగుమతులను గణనీయంగా పెంచడమే లక్ష్యంగా చర్యలు తీసుకుంటున్నట్లు ఆయన వివరించారు. కొత్తగా రానున్న ఈ కొత్త ఈవీలో 60కేడబ్ల్యూహెచ్ బ్యాటరీ ఉంటుందని, ఇది 500 కిలోమీటర్ల రేంజ్ ఇస్తుందని ఆయన చెప్పారు.
కాగా మారుతీ సుజుకీ సీఈఓ ఇటీవల న్యూఢిల్లీలో జరిగిన సియామ్ 64వ వార్షిక సెషన్లో ఆయన మాట్లాడుతూ కీలక విషయాలు వెల్లడించారు. తాము 500 కి.మీ ల హై రేంజ్ తో కూడిన అధిక స్పెసిఫికేషన్ ఈవీని కలిగి తీసుకొస్తున్నట్లు చెప్పారు. 60 కిలోవాట్ అవర్ బ్యాటరీతో శక్తిని కలిగి ఉంటుందని చెప్పారు. కస్టమర్ విశ్వాసాన్ని పెంపొందించుకోడానకి ఇదే ఈవీ లను భారత దేశంతో పాటు యూరోప్, జపాన్ వంటి మార్కెట్లకు కూడా ఎగుమతి చేయనున్నట్లు ఆయన పేర్కొన్నారు.
కస్టమర్లకు ఎలక్ట్రిక్ వాహనాలపై ఉన్న ఆందోళనలను తొలగించడానికి అనేక పరిష్కారాలను తాము అందిస్తున్నామని చెప్పారు. తమ బలమైన నెట్ వర్క్ ద్వారా వినియోగదారులకు మంచి సర్వీస్ ను అందిస్తామని ఆయన తెలిపారు. దేశీయ విపణిలో, కార్బన్ ఉద్గారాలను ఎదుర్కోడానికి మారుతి తన కార్లలో అన్ని రకాల సాంకేతికతలను ఉపయోగించాలని చూస్తోంది. అందుకోసం ఎలక్ట్రిక్, బలమైన హైబ్రిడ్ కార్లతో పాటు, ఆటోమేకర్ బయో ఇంధనాలు, హైడ్రోజన్ లతో కూడిన మోడళ్లను అభివృద్ధి చేయడంపై దృష్టి పెడుతుంది. చమురు వినియోగం, సీఓ2 ఉద్గారాలను తగ్గించడానికి హైడ్రోజన్, బలమైన హైబ్రిడ్‌లు, జీవ ఇంధనాలు వంటివి బాగా ఉపకరిస్తాయట. మొత్తానికి మారుతి సుజుకి కంపెనీ వినియోగదారుల ఎదురుచూపులు ఫలించబోతున్నాయి.