Second Hand Cars: మెరిసే లగ్జరీ కార్లు ఎవరికైనా ఇష్టమే. వాటి అద్భుతమైన డిజైన్, సౌకర్యవంతమైన క్యాబిన్, శక్తివంతమైన పర్ఫార్మెన్స్ అన్నీ కలిసి ఒక ప్రత్యేకమైన అనుభూతిని ఇస్తాయి. అయితే కొత్త లగ్జరీ కార్ల ధరలు చూసినప్పుడు చాలామంది తమ కలను మధ్యలోనే వదిలేస్తుంటారు. ఇలాంటి సమయంలో సెకండ్ హ్యాండ్ లగ్జరీ కార్లు ఒక చక్కని ప్రత్యామ్నాయంగా కనిపిస్తాయి. ఇవి తక్కువ బడ్జెట్లోనే ప్రీమియం అనుభవాన్ని అందిస్తాయి. అయితే ఈ డీల్ ఎంత లాభదాయకంగా అనిపిస్తుందో? అంతే రిస్క్తో కూడుకున్నది కూడా. అందుకే సెకండ్ హ్యాండ్ లగ్జరీ కారు కొనే ముందు అందులోని సానుకూల, ప్రతికూల అంశాలను పూర్తిగా అర్థం చేసుకోవడం చాలా ముఖ్యం.
నేటి కాలంలో చాలామంది కొత్త కారుకు బదులుగా సెకండ్ హ్యాండ్ లగ్జరీ కారును ఎంచుకోవడానికి ప్రధాన కారణం ధర. కొత్త కార్లతో పోలిస్తే సెకండ్ హ్యాండ్ కార్లు చాలా తక్కువ ధరకే లభిస్తాయి. దీనివల్ల సామాన్యుల బడ్జెట్లో కూడా ప్రీమియం బ్రాండ్ కారును సొంతం చేసుకోవడం సాధ్యమవుతుంది. దీనితో పాటు తక్కువ ఖర్చుతోనే సమాజంలో మంచి హోదాను, మెరుగైన డ్రైవింగ్ అనుభవాన్ని పొందవచ్చని ప్రజలు భావిస్తుంటారు.
సెకండ్ హ్యాండ్ లగ్జరీ కారు కొనడం వల్ల లభించే అతిపెద్ద ప్రయోజనం ఏమిటంటే.. లగ్జరీ కార్లు మొదటి 3 నుండి 5 ఏళ్లలోనే తమ అసలు ధరలో 40 నుండి 60 శాతం వరకు విలువను కోల్పోతాయి. దీనివల్ల కొత్తగా ఉన్నప్పుడు కోట్లలో ఉన్న కారు, కొన్ని ఏళ్ల తర్వాత సగం ధరకే అందుబాటులోకి వస్తుంది. ఇలా తక్కువ ధరకే పవర్ సీట్లు, లెదర్ ఇంటీరియర్, సన్రూఫ్, అడ్వాన్స్డ్ మ్యూజిక్ సిస్టమ్, స్మార్ట్ టెక్నాలజీ వంటి ప్రీమియం ఫీచర్లను పొందవచ్చు. అంతేకాకుండా లగ్జరీ కార్లలో భద్రతకు అత్యధిక ప్రాధాన్యత ఇస్తారు. కాబట్టి వీటిలో ఎయిర్బ్యాగ్స్, ఏబీఎస్ (ABS), ఈబీడీ (EBD) వంటి భద్రతా ఫీచర్లు సహజంగానే ఉంటాయి. వీటి తయారీ నాణ్యత కూడా చాలా బలంగా ఉంటుంది.
Also Read: నా స్నేహితులు కూడా నాపై కుట్ర చేస్తున్నారు.. శివాజీ కీలక వ్యాఖ్యలు
అయితే ఇందులో కొన్ని నష్టాలు కూడా ఉన్నాయి. వాటిని ఏమాత్రం విస్మరించకూడదు. కారు ధర తక్కువగా అనిపించినప్పటికీ దాని నిర్వహణ, సర్వీసింగ్ ఖర్చులు జేబుకు భారంగా మారుతాయి. లగ్జరీ కార్ల సర్వీసింగ్ ఖర్చు సాధారణ కార్ల కంటే చాలా రెట్లు ఎక్కువగా ఉంటుంది. కొన్నిసార్లు సంవత్సరానికి లక్ష రూపాయల కంటే ఎక్కువే ఖర్చు కావచ్చు. అలాగే వీటి స్పేర్ పార్ట్స్ సులభంగా దొరకవు. ఒకవేళ దొరికినా వాటి ధరలు చాలా ఎక్కువగా ఉంటాయి. మైలేజీ విషయంలో కూడా ఈ కార్లు వెనుకబడి ఉంటాయి. వీటి ఇంజన్లు శక్తివంతంగా ఉండటం వల్ల ఇంధనం ఎక్కువగా ఖర్చవుతుంది. బడ్జెట్ పరిమితుల వల్ల పాత మోడల్ కారును ఎంచుకోవాల్సి వస్తే అందులో లేటెస్ట్ టెక్నాలజీ లేకపోవడమే కాకుండా పాతబడటం వల్ల ఎలక్ట్రానిక్ లేదా మెకానికల్ సమస్యలు వచ్చే అవకాశం కూడా ఉంటుంది.
చివరగా సెకండ్ హ్యాండ్ లగ్జరీ కారు కొనడం అనేది సరైన పరిశోధన చేసి తీసుకుంటే ఒక స్మార్ట్ నిర్ణయం అవుతుంది. కారు కండిషన్, దాని సర్వీస్ హిస్టరీ, డాక్యుమెంట్లను క్షుణ్ణంగా తనిఖీ చేయడంతో పాటు భవిష్యత్తులో వచ్చే మెయింటెనెన్స్ ఖర్చులకు మానసికంగా సిద్ధంగా ఉండాలి. లాభనష్టాలను బేరీజు వేసుకుని అడుగు ముందుకు వేస్తే తక్కువ ధరకే మీ లగ్జరీ కారు కల నెరవేరుతుంది. లేదంటే తొందరపాటు నిర్ణయం ఇబ్బందులకు దారితీయవచ్చు.