Hero MotoSports : భారతదేశపు ప్రముఖ ద్విచక్ర వాహనాల తయారీ సంస్థ ‘హీరో మోటోకార్ప్’కు చెందిన రేసింగ్ విభాగం “హీరో మోటోస్పోర్ట్స్ టీమ్ ర్యాలీ” అంతర్జాతీయ రేసింగ్ రంగాన్ని శాసిస్తూ విజయవంతంగా 10 వసంతాలను పూర్తి చేసుకుంది. ఈ చారిత్రాత్మక మైలురాయిని పురస్కరించుకొని జైపూర్లోని తమ సెంటర్ ఫర్ ఇన్నోవేషన్ అండ్ టెక్నాలజీ (CIT) వేదికగా కంపెనీ ఘనంగా వేడుకలను నిర్వహించింది. ప్రపంచంలోనే అత్యంత కఠినమైన డాకర్ ర్యాలీ నిర్వాహకులైన అమౌరీ స్పోర్ట్ ఆర్గనైజేషన్ (ASO)తో తమకున్న అంతర్జాతీయ భాగస్వామ్యాన్ని హీరో మోటోకార్ప్ మరో ఐదేళ్ల పాటు పొడిగిస్తున్నట్లు ఈ వేదికపై అధికారికంగా ప్రకటించింది. 2016లో ప్రారంభమైన ఈ ప్రస్థానం ద్వారా అంతర్జాతీయ మోటోస్పోర్ట్ మ్యాప్లో భారత్ను అగ్రగామిగా నిలబెట్టామని, రాబోయే దశాబ్దంలో ఈ బంధం ప్రపంచవ్యాప్తంగా సరికొత్త రికార్డులకు బాటలు వేస్తుందని హీరో మోటోకార్ప్ ఎగ్జిక్యూటివ్ చైర్మన్ డాక్టర్ పవన్ ముంజాల్ ధీమా వ్యక్తం చేశారు. ఈ వేడుకలో 2024 వరల్డ్ ఛాంపియన్ రాస్ బ్రాంచ్, నాచో కార్నెజో వంటి అంతర్జాతీయ రేసింగ్ దిగ్గజాలు పాల్గొని ప్రత్యేక ఆఫ్-రోడ్ విన్యాసాలతో సందడి చేశారు.
భారతదేశంలో దాగి ఉన్న యువ ఆఫ్-రోడ్ బైకింగ్ ప్రతిభను వెలికితీసి అంతర్జాతీయ స్థాయి ఛాంపియన్లుగా తీర్చిదిద్దడమే లక్ష్యంగా హీరో మోటోస్పోర్ట్స్ “ఇండియాస్ నెక్స్ట్ డాకర్ హీరో” (INDH) అనే ప్రతిష్టాత్మక ప్రోగ్రామ్ను లాంఛనంగా ప్రారంభించింది. ఈ సరికొత్త వ్యూహాత్మక డెవలప్మెంట్ ప్లాన్ కింద ఎంపికైన యువ రైడర్లకు నావిగేషన్, రైడింగ్ టెక్నిక్స్ మరియు శారీరక దృఢత్వంపై 2 నుండి 3 ఏళ్ల పాటు అంతర్జాతీయ నిపుణులతో కఠినమైన శిక్షణ ఇప్పిస్తారు. ఇందులో భాగంగానే నేషనల్ సూపర్క్రాస్ సర్క్యూట్లో సంచలన రికార్డులు సృష్టించిన మహారాష్ట్రకు చెందిన 18 ఏళ్ల యువ రేసర్ శ్లోక్ ఘోర్పడేను హీరో మోటోస్పోర్ట్స్ తమ జట్టులోకి అధికారికంగా తీసుకుంది. ప్రస్తుతం శ్లోక్ మొరాకోలో జరిగే ఇంటెన్సివ్ రేస్ సిమ్యులేషన్స్తో పాటు ప్రపంచ ఛాంపియన్లతో కలిసి శిక్షణ పొందుతున్నాడు. దేశీయంగా ఉన్న టాలెంట్ను అంతర్జాతీయ రేసింగ్ వేదికలపైకి చేర్చేందుకు హీరో సంస్థ తీసుకుంటున్న ఈ చొరవను భారతీయ మోటోస్పోర్ట్స్ వర్గాలు ఒక విప్లవాత్మక అడుగుగా అభివర్ణిస్తున్నాయి.