TTD : శ్రీవారి వార్షిక బ్ర‌హ్మోత్స‌వాల‌కు సీఎం జ‌గ‌న్‌ను ఆహ్వానించిన టీటీడీ ఛైర్మ‌న్ భూమ‌న‌

Ttd

తిరుమల శ్రీ వేంకటేశ్వర స్వామివారి వార్షిక బ్రహ్మోత్సవాలకు సీఎం జ‌గ‌న్‌ను టీటీడీ ఛైర్మ‌న్ భూమ‌న క‌రుణాక‌ర్‌, దేవాదాయ శాఖ మంత్రి కొట్టు స‌త్య‌నారాయ‌ణ, ఈవో ధ‌ర్మారెడ్డి ఆహ్వానించారు. సెప్టెంబర్ 18న ప్రారంభమై తొమ్మిది రోజుల పాటు జరిగే బ్రహ్మోత్సవాలకు సంబంధించిన ఆహ్వాన పత్రికలను సీఎం జ‌గ‌న్‌కు అందించారు. సంప్రదాయంలో భాగంగా సెప్టెంబర్ 18న శ్రీ వెంకటేశ్వర స్వామికి ఏపీ ప్రభుత్వం తరపున పట్టువస్త్రాలను సీఎం జ‌గ‌న్ సమర్పించనున్నారు. సెప్టెంబర్ 18 సాయంత్రం దివ్య ధ్వజారోహణం కార్యక్రమంతో ఉత్సవాలు ప్రారంభమవుతాయి. పవిత్ర ధ్వజారోహణం అనంతరం బేడి ఆంజనేయ స్వామి ఆలయం నుంచి శ్రీవేంకటేశ్వర స్వామికి సమర్పించే పట్టువస్త్రాలను తీసుకుని తిరుమల ఆలయం వరకు ఊరేగింపులో సీఎం జ‌గ‌న్‌ పాల్గొంటారు. అదే రోజు రాత్రి పెద్ద శేషవాహనం ఊరేగింపులో సీఎం జగన్ పాల్గొన‌నున్నారు. బ్రహ్మోత్సవాల సందర్భంగా సెప్టెంబర్ 18 ఉదయం తిరుపతిలో 684 కోట్లతో నిర్మించిన శ్రీనివాస సేతు ఎలివేటెడ్ ఎక్స్‌ప్రెస్‌వే ప్రాజెక్టును ముఖ్యమంత్రి ప్రారంభించనున్నారు. తొమ్మిది రోజుల పాటు జరిగే వార్షిక బ్రహ్మోత్సవాలను సజావుగా నిర్వహించేందుకు తిరుమల, తిరుపతిలో విస్తృత ఏర్పాట్లు చేస్తున్నారు.