Chandrababu : ఆంధ్రప్రదేశ్ సీఎం చంద్రబాబు నాయుడు మరోసారి గత పాలనను తప్పుపడుతూ, తమ ప్రభుత్వం రైతుల సంక్షేమానికి అంకితమై ఉందని స్పష్టంచేశారు. మాజీ సీఎం జగన్మోహన్రెడ్డి రైతులను మోసం చేశారని, “రైతు భరోసా” పథకం పేరుతో రైతులను నమ్మబలికారని తీవ్రంగా విమర్శించారు. మేము మాట ఇచ్చినట్టే నడుస్తాం. రైతులకు కేంద్రం అందించే సహాయంతో పాటు రాష్ట్రం నుంచి అదనంగా ఇచ్చే మొత్తాన్ని కలిపి రూ.20,000 చొప్పున ప్రతి అర్హ రైతు ఖాతాలో నేరుగా జమ చేయనున్నాం అని ఆయన చెప్పారు. పార్టీ ముఖ్య నేతలతో టెలికాన్ఫరెన్స్ నిర్వహించిన చంద్రబాబు, ఈ నిర్ణయాన్ని పూర్తిగా అమలు చేయాలని, దీనిపై గ్రామ స్థాయిలో చైతన్యం కలిగించాలని సూచించారు.
అన్నదాత సుఖీభవ, ఉచిత బస్సు ప్రయాణం పథకాలపై దృష్టి
ఈ నెలలో అమలులోకి రానున్న అన్నదాత సుఖీభవ పథకం ద్వారా రైతులకు తక్షణ ఉపశమనాన్ని అందించాలని ప్రభుత్వం లక్ష్యంగా పెట్టుకుంది. మహిళల ప్రయాణ ఖర్చును తగ్గించేందుకు ఉచిత బస్సు ప్రయాణ సౌకర్యాన్ని ప్రవేశపెట్టనున్నట్లు సీఎం పేర్కొన్నారు. ఈ రెండు పథకాలు కూటమి ప్రభుత్వ సంకల్పానికి నిదర్శనంగా నిలుస్తాయని ఆయన అభిప్రాయపడ్డారు. పార్టీ శ్రేణులు ఈ కార్యక్రమాల్లో చురుకుగా పాల్గొనాలని, ప్రతి గ్రామానికి ఈ ప్రయోజనాలు చేరేలా చూడాలని చంద్రబాబు దిశానిర్దేశం చేశారు. ఇది ఓ సామూహిక పోరాటం. ప్రజల నమ్మకాన్ని గెలుచుకోవాలంటే నిస్వార్థంగా పనిచేయాలి అని ముఖ్యమంత్రి చంద్రబాబు పేర్కొన్నారు.
గతాన్ని మరువకుండా, భవిష్యత్తును దృష్టిలో ఉంచుకుని
గతంలో అమలు చేసిన అనేక మంచి పథకాలు ప్రజల్లోకి బలంగా వెళ్లలేకపోయాం. ప్రచార లోపం కారణంగా ప్రజలకు తెలియకుండానే వాటిని విస్మరించాం. ఈసారి అలాంటి పొరపాట్లకు తావు ఇవ్వకూడదు అంటూ గత అనుభవాల్ని గుర్తు చేశారు చంద్రబాబు. ప్రజల మధ్య చేరి, ప్రభుత్వ పనితీరును నిష్కల్మషంగా తెలియజేయాలని నేతలకు సూచించారు.
పదవుల భర్తీపై స్పష్టత
పార్టీకి సేవ చేసినవారికి న్యాయం చేయడమే తన ధ్యేయమని పేర్కొన్న చంద్రబాబు పదవులు మేము కేవలం పేరు కోసమే ఇవ్వం. కష్టపడి పనిచేసిన వారే అర్హులు అని అన్నారు. త్వరలో నామినేటెడ్ పదవుల భర్తీ జరగబోతుందని తెలిపారు. ఎంపీలు, ఎమ్మెల్యేలు, మంత్రులు, కో-ఆర్డినేటర్లు ప్రజలతో చక్కటి సంబంధం ఉంచుకుంటూ, వారిలో ప్రభుత్వం పట్ల నమ్మకాన్ని పెంచేలా చర్యలు తీసుకోవాలని కోరారు.
కూటమి పాలనకు ప్రజల మద్దతే బలంగా
చంద్రబాబు స్పష్టంగా తెలియజేసిన విధంగా, ఇది కేవలం అధికార పరంగా తీసుకోకూడదు. ప్రజల సంక్షేమానికి ప్రతి అడుగు ముందుకు వేయాలి. ప్రజల మద్దతే ప్రభుత్వ బలానికి మూలాధారం అని వ్యాఖ్యానించిన ఆయన, పార్టీ శ్రేణులకు స్పష్టమైన కార్యాచరణను సూచించారు.
Read Also: Uttarakhand : వైద్య నిర్లక్ష్యంతో ఏడాది పసివాడి మరణం..ఐదు ఆసుపత్రులు, రెండు రోజుల ప్రయాణం, చివరకు విషాదాంతం