ఆంధ్రప్రదేశ్ ప్రభుత్వం (AP Govt) ఆర్టీసీ బస్సుల్లో మహిళలకు ఉచిత ప్రయాణ (Free Bus) పథకాన్ని మరో ఐదు రోజుల్లో ప్రారంభించనుంది. ఈ పథకం మహిళల్లో ఎంతో ఆశను, సంతోషాన్ని నింపింది. అయితే ఈ పథకానికి కొన్ని పరిమితులు ఉంటాయని, అన్ని బస్సులకు, అన్ని రూట్లకు ఇది వర్తించదని వస్తున్న వార్తలు మహిళలకు కొంత నిరాశ కలిగించవచ్చు. ఈ పథకం పూర్తి వివరాలు ఇంకా అధికారికంగా ప్రకటించనప్పటికీ, కొన్ని నిర్దిష్ట ప్రయాణాలపై ఉచిత ప్రయాణం ఉండదని తెలుస్తోంది.
ప్రస్తుతం అందుతున్న సమాచారం ప్రకారం.. ఈ పథకం కింద అన్ని రకాల బస్సుల్లో ఉచిత ప్రయాణం ఉండదు. ముఖ్యంగా నాన్‌స్టాప్ ఎక్స్‌ప్రెస్ బస్సుల్లో మహిళలకు ఉచిత ప్రయాణ సదుపాయం ఉండదు. ఈ బస్సులు తక్కువ స్టాప్‌లతో వేగంగా ప్రయాణిస్తాయి. అలాగే తిరుమల, శ్రీశైలం, పాడేరు వంటి ప్రముఖ పర్యాటక మరియు పుణ్యక్షేత్రాలకు నడిచే ఎక్స్‌ప్రెస్ బస్సుల్లో కూడా ఉచిత ప్రయాణం వర్తించదని తెలుస్తోంది.
Coolie Mania : సెలవు ప్రకటించిన సాఫ్ట్ వెర్ కంపెనీ
అంతేకాకుండా అంతర్రాష్ట్ర బస్సులకు కూడా ఈ పథకం వర్తించదని సమాచారం. ఆంధ్రప్రదేశ్ నుంచి కర్ణాటక, తమిళనాడు, తెలంగాణ వంటి ఇతర రాష్ట్రాలకు తిరిగే ఇంటర్-స్టేట్ ఎక్స్‌ప్రెస్ బస్సుల్లో మహిళలకు ఉచిత ప్రయాణం కల్పించకూడదని ప్రభుత్వం నిర్ణయించినట్లు తెలుస్తోంది. ఈ నిబంధనల వల్ల, దూర ప్రాంతాలకు ప్రయాణించే మహిళలకు ఈ పథకం వల్ల పెద్దగా ప్రయోజనం ఉండకపోవచ్చు.
ఈ నిబంధనలు పథకం యొక్క పూర్తి ప్రయోజనాలను తగ్గిస్తాయేమోనని చాలా మంది మహిళలు ఆందోళన వ్యక్తం చేస్తున్నారు. అయితే, ఈ పరిమితులు పథకం యొక్క ఆర్థిక భారాన్ని తగ్గించడానికి ఉద్దేశించినవి కావచ్చని ప్రభుత్వం భావిస్తోంది. పథకం యొక్క అధికారిక ప్రకటన వెలువడితేనే పూర్తి స్పష్టత వస్తుంది. ప్రభుత్వం పూర్తి వివరాలను త్వరలోనే వెల్లడిస్తుందని ఆశిద్దాం.