AP Elections 2024: తెలంగాణ రాష్ట్రంలో కాంగ్రెస్ పార్టీ మెజారిటీ సాధించి ప్రభుత్వాన్ని ఏర్పాటు చేసింది. ఇటీవల జరిగిన ఎన్నికల్లో బీఆర్ఎస్ ఓటమి చెంది ప్రతిపక్షానికే పరిమితమైంది. కర్ణాటకలోనూ కాంగ్రెస్ అనూహ్య విజయాన్ని అందుకుంది. ఈ విజయాలతో ఉర్రూతలూగించిన కాంగ్రెస్ తదుపరి అసెంబ్లీ, లోక్‌సభ ఎన్నికలకు సిద్దమవుతుంది. త్వరలో ఏపీలో ఎన్నికలు జరగనున్నాయి. అసెంబ్లీ, పార్లమెంట్ స్థానాలకు గాను ఏపీలో ఎలెక్షన్స్ నిర్వహించనుంది ఈసీ. ఈ సందర్భంగా తెలంగాణ కాంగ్రెస్ పొరుగు రాష్ట్రం ఆంధ్రప్రదేశ్‌లో ప్రచారం చేసే అవకాశం ఉంది.
విశ్వసనీయ సమాచారం ప్రకారం.. తెలంగాణ కాంగ్రెస్‌లోని మంత్రులు, సీనియర్ నేతల మధ్య చర్చలు జరుగుతున్నాయి. ఈ మేరకు సీనియర్ మంత్రులు మరియు అనుభవజ్ఞులైన నాయకులను ఏపీలో ఎన్నికల ప్రచారానికి రప్పించేందుకు ప్రణాళికలు రచిస్తున్నారు అయితే ఈ చర్చలు ఇంకా ప్రారంభ దశలోనే ఉన్నాయి. ఇందుకోసం సమన్వయ సమావేశాలు నిర్వహించాల్సి ఉందని తెలంగాణ మంత్రి ఒకరు తెలిపారు.
వైఎస్ఆర్ తెలంగాణ పార్టీ వ్యవస్థాపకురాలు వైఎస్ షర్మిల తన పార్టీని కాంగ్రెస్‌లో విలీనం చేసి తెలంగాణలో అసెంబ్లీ ఎన్నికలకు దూరంగా ఉన్నారు. కాంగ్రెస్‌లో చేరిన తర్వాత వైఎస్ షర్మిల ఆంధ్రప్రదేశ్‌ కాంగ్రెస్ కమిటీ అధ్యక్షురాలిగా బాధ్యతలు స్వీకరించారు. ఈ నేపథ్యంలో వచ్చే ఎన్నికల్లో తన ప్రభావాన్ని చూపించాలనుకుంటుంది. తెలంగాణ , కర్నాటక ఎన్నికల్లో కాంగ్రెస్ విజయం సాధించడంతో ఇప్పుడు ఆంధ్రప్రదేశ్‌లో అసెంబ్లీ, లోక్‌సభ ఎన్నికల్లో వీలైనన్ని ఎక్కువ సీట్లు సాధించాలని అఖిల భారత కాంగ్రెస్ కమిటీ ఉవ్విళ్లూరుతోంది. లోక్‌సభ ఎన్నికలపై ప్రత్యేక దృష్టి సారించింది. దక్షిణ భారతదేశంలో తన సంఖ్యను పెంచుకోవడానికి పార్టీ వ్యూహాలు రచిస్తుంది.
తెలంగాణలో అసెంబ్లీ ఎన్నికల సందర్భంగా కర్ణాటక ముఖ్యమంత్రి సిద్ధరామయ్య, ఉప ముఖ్యమంత్రి డికె శివ కుమార్ విస్తృతంగా ప్రచారం నిర్వహించారు. ఇది తెలంగాణ కాంగ్రెస్ అధికారంలోకి రావడానికి దోహదపడింది. అదేవిధంగా ఆంధ్రప్రదేశ్‌లో కూడా ప్రచారం నిర్వహించేందుకు ప్లాన్‌ చేస్తున్నాం అని తాజాగా మంత్రి చెప్పారు.కాగా తిరుమల తిరుపతి దేవస్థానంతో కొన్ని అంశాలపై చర్చించేందుకు త్వరలో ఆంధ్రప్రదేశ్‌కు వస్తానని దేవాదాయ శాఖ మంత్రి కొండా సురేఖ తెలిపారు. రాష్ట్రం నుండి దర్శనం కోసం తిరుమలకు వచ్చే నాయకులు మరియు ఇతరులకు దర్శన సౌకర్యాలు మరియు ప్రోటోకాల్‌లు వంటి కొన్ని సమస్యలు ఉన్నాయి. తెలంగాణ నుంచి ఎన్నికైన ప్రజాప్రతినిధులు ఇచ్చే లేఖలను టీటీడీ అధికారులు గౌరవించడం లేదని పలువురు అన్నారు. తెలంగాణ భక్తుల సౌకర్యార్థం ఈ అంశాలన్నింటినీ క్రమబద్ధీకరించేందుకు చర్చించనున్నట్లు ఆమె తెలిపారు.
Also Read: Ola E Bike : ఓలా ఈ-బైక్.. ఛార్జీ కిలోమీటరుకు 5 మాత్రమే