- పండగ వేళ సమ్మె బాట పట్టబోతున్న ఆర్టీసీ డ్రైవర్స్
- స్త్రీశక్తితో అధిక రద్దీ వల్ల భారం
- రాష్ట్రంలో దాదాపు 2,500 అద్దె బస్సులు
ఆంధ్రప్రదేశ్ రాష్ట్ర రవాణా సంస్థ (APSRTC) లో కీలక భాగమైన అద్దె బస్సుల యజమానులు సమ్మె బాట పట్టడం ప్రయాణికుల్లో ఆందోళన కలిగిస్తోంది. సంక్రాంతి పండుగ వేళ కోట్లాది మంది తమ గ్రామాలకు వెళ్లేందుకు సిద్ధమవుతున్న తరుణంలో, ఈ నెల 12 నుంచి సమ్మెకు దిగుతున్నట్లు యజమానుల సంఘం ప్రకటించింది. ఈ మేరకు నేడు వారు ఆర్టీసీ అధికారులకు అధికారికంగా సమ్మె నోటీసును అందజేయనున్నారు. ప్రభుత్వం ప్రవేశపెట్టిన ‘స్త్రీశక్తి’ పథకం (మహిళలకు ఉచిత బస్సు ప్రయాణం) వల్ల బస్సుల్లో రద్దీ విపరీతంగా పెరిగిందని, దీనివల్ల వాహనాలపై భారం పడి నిర్వహణ ఖర్చులు, టైర్లు, ఇంజిన్ మరమ్మతుల ఖర్చులు రెట్టింపయ్యాయని వారు ఆవేదన వ్యక్తం చేస్తున్నారు.
ప్రస్తుతం ఉన్న రద్దీ దృష్ట్యా ఆర్టీసీ యాజమాన్యం స్పందించి, ఒక్కో బస్సుకు నెలకు అదనంగా రూ.5,200 ఇవ్వడానికి నిన్న ఉత్తర్వులు జారీ చేసింది. అయితే, ఈ మొత్తం తమకు ఏమాత్రం సరిపోదని యజమానులు తెగేసి చెబుతున్నారు. పెరిగిన డీజిల్ ధరలు, అదనపు లోడ్ కారణంగా వచ్చే ఇతర ఖర్చులను పరిగణనలోకి తీసుకుని, నెలకు కనీసం రూ.15,000 నుండి రూ.20,000 వరకు అదనంగా చెల్లించాలని వారు డిమాండ్ చేస్తున్నారు. ప్రభుత్వం స్పష్టమైన హామీ ఇవ్వకపోతే వెనక్కి తగ్గేది లేదని హెచ్చరిస్తున్నారు.
రాష్ట్రవ్యాప్తంగా ఆర్టీసీలో దాదాపు 2,500 అద్దె బస్సులు నడుస్తున్నాయి. సంక్రాంతి వంటి అతిపెద్ద పండుగ సమయంలో ఈ బస్సులు నిలిచిపోతే రవాణా వ్యవస్థ పూర్తిగా స్తంభించిపోయే ప్రమాదం ఉంది. ముఖ్యంగా దూరప్రాంతాలకు వెళ్లే ప్రయాణికులకు సీట్లు దొరక్క తీవ్ర ఇబ్బందులు తప్పవు. ప్రభుత్వం, ఆర్టీసీ యాజమాన్యం తక్షణమే యజమానులతో చర్చలు జరిపి సమ్మెను నివారించకపోతే, పండుగ సెలవుల్లో సామాన్య ప్రయాణికులకు ప్రైవేట్ ట్రావెల్స్ దోపిడీ పెరిగే అవకాశం ఉంది. ఈ సంక్షోభం ప్రయాణికుల పాలిట శాపంగా మారకముందే పరిష్కారం లభించాలని అందరూ కోరుకుంటున్నారు.