చిత్తూరు జిల్లాలోని పలమనేరు మండలం ముసలిమడుగులో ఏర్పాటు చేసిన కుంకీ ఏనుగుల (Kumki Elephants) శిక్షణ కేంద్రాన్ని ఆంధ్రప్రదేశ్ ఉప ముఖ్యమంత్రి పవన్ కళ్యాణ్ శనివారం ప్రారంభించారు. సుమారు 20 ఎకరాల విస్తీర్ణంలో ఏర్పాటు చేసిన ఈ ప్రత్యేక కేంద్రం, అడవి ఏనుగుల దాడులను నియంత్రించడంలో కీలక పాత్ర పోషించనుందని అధికారులు తెలిపారు. కర్ణాటక రాష్ట్రం నుంచి నాలుగు కుంకీ ఏనుగులను ఈ కేంద్రానికి తరలించి శిక్షణ కార్యక్రమం ప్రారంభించారని పవన్ కళ్యాణ్కు వివరించారు. రాష్ట్రంలో తరచుగా జరుగుతున్న అడవి ఏనుగుల దాడులను తగ్గించేందుకు ఈ కేంద్రం ఒక వ్యూహాత్మక చర్యగా పరిగణిస్తున్నారు.
Mukesh Ambani : తిరుమల శ్రీవారిని దర్శించుకున్న ముకేశ్ అంబానీ
కుంకీ ఏనుగులు అంటే అడవి ఏనుగులను అదుపులో ఉంచేందుకు ప్రత్యేకంగా శిక్షణ పొందిన పశువులు. వీటిని ఉపయోగించి మానవ నివాస ప్రాంతాల్లోకి చొరబడే అడవి ఏనుగులను సురక్షితంగా తిరిగి అడవుల్లోకి తరలిస్తారు. పవన్ కళ్యాణ్ ఈ ప్రాజెక్టు ప్రాధాన్యతను గుర్తించి, అటవీ శాఖ చేపట్టిన ఈ యత్నాన్ని ప్రశంసించారు. ఏనుగులకు నమస్కరించి ఆశీర్వాదం తీసుకున్న ఆయన, వాటి ప్రవర్తనను ఆసక్తిగా గమనించారు. అలాగే ఏనుగులకు ఆహారం తినిపిస్తూ, వాటి సంరక్షణపై సిబ్బందిని ప్రశంసించారు.
ఈ సందర్భంలో పవన్ కళ్యాణ్ మాట్లాడుతూ, “అడవి జంతువులు కూడా మన పర్యావరణ వ్యవస్థలో భాగం. వాటి భద్రతతో పాటు మనుషుల భద్రత కూడా సమానంగా ముఖ్యం” అని తెలిపారు. ప్రభుత్వం పర్యావరణ సంరక్షణ, వన్యప్రాణి రక్షణకు కట్టుబడి ఉందని, రాబోయే రోజుల్లో రాష్ట్రంలోని ఇతర ప్రాంతాల్లో కూడా ఇలాంటి కుంకీ కేంద్రాలను ఏర్పాటు చేస్తామని ప్రకటించారు. ఈ కేంద్రం ద్వారా అడవి ఏనుగుల వల్ల కలిగే మానవ నష్టాలు, పంట నష్టాలను తగ్గించగలమని ఆయన నమ్మకం వ్యక్తం చేశారు.