Nara Lokesh : ఆంధ్రప్రదేశ్ రాష్ట్ర విద్య, ఐటీ శాఖల మంత్రి నారా లోకేశ్కు మరో అంతర్జాతీయ గౌరవం దక్కింది. రాష్ట్రంలో విద్యారంగంలో చేస్తున్న సమగ్ర సంస్కరణలు, నూతన విధానాలు ఆంధ్రప్రదేశ్ను “ఏపీ మోడల్ ఆఫ్ ఎడ్యుకేషన్”గా తీర్చిదిద్దుతున్న విషయం తెలిసిందే. ఈ నేపథ్యంలో ఆస్ట్రేలియా ప్రభుత్వం మంత్రి లోకేశ్ను ప్రత్యేకంగా ఆహ్వానించింది. ఆస్ట్రేలియాలో నిర్వహించనున్న ప్రతిష్టాత్మక స్పెషల్ విజిట్స్ ప్రోగ్రామ్ (Special Visits Program) లో పాల్గొనాలని కోరుతూ ఢిల్లీలోని ఆస్ట్రేలియా హైకమిషనర్ ఫిలిప్ గ్రీన్ స్వయంగా మంత్రి నారా లోకేశ్కు ఆహ్వాన లేఖ పంపారు. ఈ కార్యక్రమానికి ఎంపిక అవడం భారత రాజకీయ నాయకుల దృష్టిలో అరుదైన గౌరవంగా భావించబడుతుంది.
ఏపీ అభివృద్ధిని గుర్తించిన ఆస్ట్రేలియా
మానవ వనరుల అభివృద్ధి, సాంకేతికత, విద్యా రంగ అభివృద్ధి, ఆర్థిక సుస్థిరత వంటి కీలక అంశాల్లో ఆంధ్రప్రదేశ్ రాష్ట్రం చేపట్టిన చర్యలు ఆస్ట్రేలియా ప్రభుత్వ దృష్టిలో పడ్డాయి. ముఖ్యంగా, విద్యారంగంలో తీసుకొచ్చిన మార్పులు, ప్రభుత్వ పాఠశాలల్లో డిజిటల్ లెర్నింగ్ ప్రోత్సాహం, స్మార్ట్ క్లాస్రూమ్స్ అమలు వంటి అంశాలపై ఆసక్తి చూపిన ఆస్ట్రేలియా, ఈ విషయాలను నేరుగా మంత్రి లోకేశ్తో చర్చించాలన్న ఉద్దేశంతోనే ఈ ఆహ్వానం పంపినట్టు తెలుస్తోంది.
అంతర్జాతీయ నాయకులతో భేటీకి అవకాశం
స్పెషల్ విజిట్స్ ప్రోగ్రామ్లో పాల్గొనడం ద్వారా ఆస్ట్రేలియాలోని ముఖ్య రాజకీయ నాయకులు, విద్యారంగ నిపుణులు, వ్యాపారవేత్తలు, ప్రవాస భారతీయులతో మంత్రి నారా లోకేశ్కు సమావేశమయ్యే అవకాశం ఉంటుంది. ఈ సమావేశాల ద్వారా రాష్ట్రానికి కావాల్సిన పెట్టుబడులు, విద్యా-సాంకేతిక రంగాల్లో సహకారం, స్కిల్స్ అభివృద్ధి, మౌలిక వసతుల ప్రణాళికలు, ఆక్వాకల్చర్ వంటి అంశాలపై ద్వైపాక్షిక చర్చలు జరపడానికి అవకాశం లభించనుంది.
గతంలో మోడీ కూడా పాల్గొన్నారు
ఈ స్పెషల్ విజిట్స్ ప్రోగ్రామ్కు ఇప్పటికే భారతదేశానికి చెందిన పలువురు ప్రముఖ రాజకీయ నాయకులు హాజరయ్యారు. 2001లో ప్రస్తుత ప్రధాని నరేంద్ర మోడీ ఈ కార్యక్రమంలో పాల్గొనడం విశేషం. దాంతో పాటు కేంద్ర మంత్రులు, రాష్ట్ర మంత్రులు, పార్లమెంటు సభ్యులు కూడా గతంలో ఈ కార్యక్రమం ద్వారా ఆస్ట్రేలియాలో పర్యటించారు. ఇప్పుడు ఆ చరిత్రలో నారా లోకేశ్ కూడా చేరడం గర్వకారణంగా ఉంది.
విద్యాభివృద్ధికి అంతర్జాతీయ మద్దతు
ఆంధ్రప్రదేశ్ ప్రభుత్వం చేపట్టిన ఇన్నోవేటివ్ విద్యా విధానాలు, నైపుణ్యాభివృద్ధి ప్రోగ్రాములు, విద్యా సదుపాయాల ప్రగతి వంటి అంశాలు ఇప్పటికే అంతర్జాతీయంగా గుర్తింపు పొందుతున్నాయి. వాటికి మరింత బలం చేకూర్చే అవకాశంగా ఈ పర్యటన మారబోతోంది. రాష్ట్రానికి అవసరమైన విదేశీ పెట్టుబడులు, విద్యా సంస్థల భాగస్వామ్యం, పరిశోధనలకు మద్దతు వంటి అంశాల్లో ముందడుగు పడే అవకాశం ఉంది. ఈ సందర్బంగా మంత్రి నారా లోకేశ్ మాట్లాడుతూ..ఆంధ్రప్రదేశ్ను విద్య, ఐటీ, పరిశోధన, నైపుణ్యాల్లో దేశంలోనే ఆదర్శంగా నిలబెట్టే లక్ష్యంతో పనిచేస్తున్నాం. ఆస్ట్రేలియా పర్యటన ద్వారా రాష్ట్రానికి ఉపయోగపడే అనేక అవకాశాలను అన్వేషిస్తాం అని తెలిపారు.
Read Also: TikTok : భారత్లోకి టిక్టాక్ మళ్లీ ఎంట్రీ?.. ఉద్యోగ నియామకాలతో ఊహాగానాలు వెల్లువ