Medaram Jathara Kova Bun Controversy : కోవా బన్ వ్యాపారికి నారా లోకేష్ భరోసా !!

Medaram Kova Bun Controversy : తెలంగాణలోని ప్రతిష్టాత్మక మేడారం జాతరలో చోటుచేసుకున్న ఒక దురదృష్టకర సంఘటన తెలుగు రాష్ట్రాల్లో చర్చనీయాంశమైంది. కర్నూలు జిల్లాకు చెందిన వలీ అనే చిరు వ్యాపారి పొట్టకూటి కోసం మేడారంలో కోవా బన్ విక్రయిస్తుండగా, కొందరు యూట్యూబర్లు అతడిపై అకారణంగా దాడికి దిగారు. ‘ఫుడ్ జిహాద్’ చేస్తున్నావంటూ నిరాధారమైన ఆరోపణలు చేయడమే కాకుండా, మతపరమైన విద్వేషాలను రెచ్చగొట్టేలా ప్రవర్తించారు. బాధితుడితో బలవంతంగా కోవా బన్ తినిపిస్తూ అవమానకరంగా చిత్రీకరించిన ఈ వీడియో సోషల్ మీడియాలో వైరల్ కావడంతో, నాగరిక సమాజం ఒక్కసారిగా ఉలిక్కిపడింది. ఒక సామాన్య వ్యాపారిని అతడి మతాన్ని బట్టి లక్ష్యంగా చేసుకోవడంపై సర్వత్రా నిరసనలు వ్యక్తమయ్యాయి.

ఈ ఘటన ఆంధ్రప్రదేశ్ ఐటీ మరియు విద్యాశాఖ మంత్రి నారా లోకేశ్ దృష్టికి వెళ్లడంతో ఆయన తక్షణమే స్పందించారు. కేవలం రాజకీయ నాయకుడిగానే కాకుండా, బాధ్యతాయుతమైన పౌరుడిగా వలీకి బహిరంగంగా క్షమాపణలు చెప్పారు. “ప్రియమైన సోదరుడు వలీ గారూ, మీకు జరిగిన అవమానానికి నేను విచారిస్తున్నాను” అంటూ ఆయన చేసిన ట్వీట్ సోషల్ మీడియాలో వైరల్ అయ్యింది. తెలుగు సమాజం ఎప్పుడూ సామరస్యానికి, సోదరభావానికి నిలయమని, ఇలాంటి మతతత్వ ప్రవృత్తులకు ఇక్కడ చోటు లేదని ఆయన కుండబద్దలు కొట్టారు. కేవలం ట్వీట్‌కే పరిమితం కాకుండా, త్వరలోనే స్వయంగా వలీని కలిసి ఆయన దగ్గర కోవా బన్ తింటానని లోకేశ్ హామీ ఇవ్వడం గమనార్హం.

మంత్రి లోకేశ్ స్పందన బాధితుడికి కొండంత అండగా నిలవడమే కాకుండా, సమాజంలో విద్వేషాలను వ్యాప్తి చేసే శక్తులకు గట్టి హెచ్చరికను పంపింది. ఒక చిరు వ్యాపారికి అండగా నిలబడటంలో ఆయన చూపిన మానవత్వంపై అటు రాజకీయ వర్గాల్లో, ఇటు సామాన్య ప్రజల్లో ప్రశంసలు వెల్లువెత్తుతున్నాయి. ఆహారం మరియు వ్యాపారం విషయంలో మతాలను అంటగట్టడం సరైన పద్ధతి కాదని, మనుషుల మధ్య విభజన రేఖలు గీయడం తెలుగు సంస్కృతి కాదని ఈ ఘటన ద్వారా మరోసారి స్పష్టమైంది. వలీ లాంటి కష్టజీవులకు భద్రత కల్పించాల్సిన బాధ్యత అందరిపై ఉందని లోకేశ్ స్పందన గుర్తుచేసింది.