ఆంధ్రప్రదేశ్ పర్యాటక రంగంలో సరికొత్త మైలురాయిని చేరుకుంది. విశాఖపట్నంలోని ప్రముఖ పర్యాటక కేంద్రం కైలాసగిరిపై నిర్మించిన అత్యాధునిక స్కైవాక్ గ్లాస్ బ్రిడ్జి నేటి నుంచి పర్యాటకులకు అందుబాటులోకి రానుంది. ఈ గ్లాస్ బ్రిడ్జి దేశంలోనే అత్యంత పొడవైనదిగా రికార్డు సృష్టించడం విశేషం. పచ్చని కొండలు, సువిశాలమైన సముద్రం మధ్య నిర్మించిన ఈ వంతెన ద్వారా పర్యాటకులు ఎత్తైన ప్రదేశం నుంచి ప్రకృతి సౌందర్యాన్ని ఆస్వాదించే అవకాశం లభిస్తుంది. పర్యాటకులకు అద్భుతమైన అనుభూతిని అందించేలా రూ. 7 కోట్ల భారీ వ్యయంతో ఈ ప్రాజెక్టును పూర్తి చేశారు.
వైజాగ్ స్కైవాక్ గ్లాస్ బ్రిడ్జి నిర్మాణంలో దేశంలోనే మునుపటి రికార్డును అధిగమించింది. దీని పొడవు ఏకంగా 50 మీటర్లు. ఇంతకుముందు కేరళలో ఉన్న 40 మీటర్ల గ్లాస్ వంతెన రికార్డును ఈ కైలాసగిరి బ్రిడ్జి బద్దలు కొట్టి, దేశంలోనే అతి పొడవైన గాజు వంతెనగా నిలిచింది. పర్యాటకులు గాజుపై నడుస్తున్నప్పుడు కింది లోయ, చుట్టూ ఉన్న ప్రకృతిని స్పష్టంగా చూడగలిగేలా అత్యున్నత నాణ్యత గల పదార్థాలను ఉపయోగించి దీనిని నిర్మించారు. ఈ వంతెన సాహస క్రీడలను, ప్రకృతి అందాలను ఇష్టపడేవారికి ఒక కొత్త గమ్యస్థానంగా మారనుంది.
Venky-Trivikram : వెంకీ – త్రివిక్రమ్ మూవీకి క్రేజీ టైటిల్!
ఈ గ్లాస్ బ్రిడ్జి కేవలం పగటిపూట మాత్రమే కాక, రాత్రి వేళల్లో కూడా ప్రధాన ఆకర్షణగా నిలవనుంది. రాత్రి సమయంలో ఈ వంతెనకు ఏర్పాటు చేసిన త్రివర్ణ (ట్రై కలర్) లైటింగ్ ప్రత్యేక శోభను ఇస్తుంది. ఈ అద్భుతమైన లైటింగ్ కారణంగా, కైలాసగిరిపై ఈ బ్రిడ్జి మరింత ప్రకాశవంతంగా, కంటికింపుగా కనిపిస్తుంది. విశాఖపట్నంలో పర్యాటక రంగాన్ని మరింత అభివృద్ధి చేయడంలో భాగంగా చేపట్టిన ఈ ప్రతిష్టాత్మక ప్రాజెక్టు, నగరానికి వచ్చే సందర్శకుల సంఖ్యను గణనీయంగా పెంచుతుందని అంచనా వేస్తున్నారు. ఈ స్కైవాక్ ప్రారంభంతో కైలాసగిరి విహార కేంద్రం కొత్త ఉత్తేజాన్ని సంతరించుకుంది.