AP : దేవాదాయ శాఖలో ఇటీవల కలకలం రేపుతున్న అంశం ఏంటంటే, సహాయ కమిషనర్ (ఏసీ) కె. శాంతిపై ఉన్నతాధికారులు తీసుకోబోయే కఠిన నిర్ణయం. శాఖ వర్గాల సమాచారం మేరకు, ఆమెపై వచ్చిన అనేక ఆరోపణల నేపథ్యంలో, కె. శాంతికి “కంపల్సరీ రిటైర్మెంట్” విధించేందుకు ప్రభుత్వం సిద్ధమవుతోంది. ఇందుకు సంబంధించిన అధికారిక ఉత్తర్వులు త్వరలో వెలువడే అవకాశముంది.
వివరణలు సంతృప్తికరంగా లేవన్న అధికారులు
గత నెల 16న దేవాదాయ శాఖ కమిషనర్ కె. శాంతికి షోకాజ్ నోటీసు జారీ చేసిన సంగతి తెలిసిందే. ఆ నోటీసుకు ఆమె ఇటీవలే సమాధానమిచ్చారు. అయితే, ఆమె సమర్పించిన వివరణలు శాఖను తృప్తిపరచలేకపోయాయని సమాచారం. ముఖ్యంగా, ఆమె వ్యక్తిగత జీవితంలో తీసుకున్న కొన్ని నిర్ణయాలు, ప్రభుత్వ ఉద్యోగ నిబంధనలకు విరుద్ధంగా ఉన్నాయని అధికారులు స్పష్టం చేస్తున్నారు.
వివాహ వివాదమే కీలకం
కె. శాంతి తన మొదటి భర్త ఎం. మదన్మోహన్తో చట్టబద్ధంగా విడాకులు పొందకుండానే, పి. సుభాష్ను రెండోసారి వివాహం చేసుకున్న విషయం పెద్దగా చర్చకు మారింది. ఈ చర్య ఏపీ సివిల్ సర్వీసు నియమావళిలోని రూల్ 25కు విరుద్ధమని అధికారులు భావిస్తున్నారు. కె. శాంతి వివరణలో తాను చాలా కాలంగా మొదటి భర్త నుంచి విడిపోయిన స్థితిలో ఉండటం వల్లే రెండో వివాహం చేసుకున్నాను అని పేర్కొన్నా, ఈ వాదనను ప్రభుత్వం అంగీకరించలేదు.
గతంలో కూడా వివాదాస్పద నిర్ణయాలు
వైఎస్ జగన్ ప్రభుత్వం హయాంలో కె. శాంతి విశాఖపట్నం జిల్లా సహాయ కమిషనర్గా, అనంతరం విశాఖ, అనకాపల్లి, ఎన్టీఆర్ జిల్లాల్లో దేవాదాయ శాఖ అధికారిణిగా కీలక పదవుల్లో సేవలందించారు. ఈ హోదాలో ఆమె తీసుకున్న కొన్ని నిర్ణయాలు తీవ్ర విమర్శల పాలయ్యాయి. ఆలయాల భూముల పరిరక్షణలో నిర్లక్ష్యం వహించారన్న అభియోగాలు ఉన్నప్పుడు, ఆలయాలకు నష్టం కలిగేలా వ్యవహరించారన్న ఆరోపణలు కూడా వచ్చాయి. ఈ ఆరోపణల నేపథ్యంలో, గతేడాది ఆగస్టులో ఆమెను విధుల నుంచి సస్పెండ్ చేస్తూ ప్రభుత్వం ఆదేశాలు జారీ చేసింది. అంతేకాక, విచారణను కూడా ప్రారంభించారు. విచారణ సమయంలో ఆమె సమర్పించిన వివరణలు ఆశించిన స్థాయిలో లేకపోవడంతో, ఇప్పుడు నిర్బంధ పదవీ విరమణ వైపు అడుగులు వేసినట్టు తెలుస్తోంది.
త్వరలో అధికారిక ఉత్తర్వులు
అంతటా ఆమెపై చర్య తీసుకోవాలనే నిర్ణయం పటిష్టంగా ఉన్న నేపథ్యంలో, వచ్చే రెండు మూడు రోజుల్లో దీనిపై అధికారిక ఉత్తర్వులు వెలువడే అవకాశం ఉంది. దీనితో, దేవాదాయ శాఖలో ఓ కీలక అధ్యాయానికి తెరపడనుంది. ఇక, పై శాంతి ఎలాంటి ప్రతికూల చర్యలు తీసుకుంటుందో, లీగల్ ఆక్షన్ కోసం ఆమె ముందుకు వెళతారో అనేది ఆసక్తికరంగా మారింది. అయితే ప్రభుత్వ వైఖరి మాత్రం ఈసారి తీవ్రంగా, నిర్దాక్షిణ్యంగా ఉండనుందని తెలిసింది.
Read Also: HYD Real Estate : హైదరాబాద్ లో రియల్ ఎస్టేట్ కుప్పకూలింది – హరీష్ రావు