ఆంధ్రప్రదేశ్ ముఖ్యమంత్రి నారా చంద్రబాబు నాయుడు (CBN) తాజాగా కలెక్టర్ల సదస్సులో ప్రభుత్వ యంత్రాంగ పనితీరుపై అసంతృప్తి వ్యక్తం చేశారు. ముఖ్యంగా హోంశాఖ, మున్సిపల్, రెవెన్యూ శాఖల పనితీరుపై ప్రజల్లో తీవ్ర అసంతృప్తి నెలకొన్నదని ఆయన స్పష్టం చేశారు. ఈ అసంతృప్తి తాలూకు నివేదికలు వివిధ సర్వేల ద్వారా కూడా బయటపడ్డాయని వెల్లడించారు. ప్రజల సమస్యలను తీర్చడంలో, వారి నమ్మకాన్ని నిలబెట్టుకోవడంలో ఈ శాఖలు విఫలమవుతున్నాయన్న ఫీడ్బ్యాక్ తనకు నిరంతరం వస్తోందని సీఎం అన్నారు.
హోంశాఖ విషయంలో పోలీస్ వ్యవస్థ ప్రజలతో అనుసంధానం లోపించడం, భద్రతా వ్యవస్థలో లోపాలు కనబడటం వంటి అంశాలు కారణమని ఆయన అభిప్రాయపడ్డారు. నేరాల నియంత్రణ, శాంతి భద్రతల పరిరక్షణలో మరింత కఠినమైన చర్యలు తీసుకోవాలని సూచించారు. అలాగే మున్సిపల్ శాఖలో శుభ్రత, మౌలిక సదుపాయాలు, నీరు-కాలువల సమస్యలు పరిష్కరించడంలో అధికారులు నిర్లక్ష్యం వహిస్తున్నారని ఆగ్రహం వ్యక్తం చేశారు. పట్టణాల్లో పౌరుల సమస్యలను తక్షణమే పరిష్కరించేందుకు మున్సిపల్ యంత్రాంగం వేగవంతంగా పనిచేయాలని ఆయన ఆదేశించారు.
Jubilee Hills By Election : జూబ్లీహిల్స్ ఉప ఎన్నిక బరిలో కాంగ్రెస్ నుండి మైనంపల్లి హన్మంతరావు..?
రెవెన్యూ శాఖలో కూడా ఫైళ్లు పేరుకుపోవడం, భూవివాదాలు సకాలంలో పరిష్కారం కాకపోవడం, పౌర సేవలందక ప్రజలు ఇబ్బందులు పడుతున్నారని సీఎం చంద్రబాబు స్పష్టం చేశారు. భూసంబంధిత సేవలు ఆన్లైన్లో అందుబాటులోకి తెచ్చినా, అమలు స్థాయిలో ఆలస్యం, అవినీతి, బాధ్యతారాహిత్యం కారణంగా ఫిర్యాదులు పెరుగుతున్నాయని ఆయన అన్నారు. అందువల్ల కలెక్టర్లు సహా ప్రతి అధికారిని ప్రజా సమస్యల పరిష్కారంపై దృష్టి సారించాలని సూచించారు.
చివరిగా అన్నీ శాఖల మంత్రులు, అధికారులు పౌరుల సమస్యలను తక్షణమే పరిష్కరించే విధంగా ఫైళ్లు క్లియర్ చేయాలని స్పష్టమైన ఆదేశాలు జారీ చేశారు. “ప్రజల నమ్మకాన్ని నిలబెట్టుకోవడం ప్రభుత్వానికి అత్యంత ముఖ్యమైన కర్తవ్యం” అని సీఎం హితవు పలికారు. ప్రభుత్వ యంత్రాంగం వేగంగా పనిచేయకపోతే, ప్రజల్లో అసంతృప్తి పెరిగి, పాలనపై ప్రతికూల ప్రభావం చూపే ప్రమాదం ఉందని హెచ్చరించారు. అందువల్ల ప్రతి శాఖ సమన్వయంతో, బాధ్యతాయుతంగా వ్యవహరించి రాష్ట్ర పరిపాలనలో విశ్వాసాన్ని పెంపొందించాలనే దిశగా కృషి చేయాలని ఆయన పిలుపునిచ్చారు.