ఆంధ్రప్రదేశ్ ప్రభుత్వం (AP Govt) చేనేతలకు శుభవార్త అందించింది. ఈరోజు నుండి ఉచిత విద్యుత్ అమలుకు ఆంధ్రప్రదేశ్ ముఖ్యమంత్రి నారా చంద్రబాబు నాయుడు గ్రీన్ సిగ్నల్ ఇచ్చారు. ఈ నిర్ణయంతో మగ్గాలకు 200 యూనిట్లు, మర మగ్గాలకు 500 యూనిట్ల వరకు ఉచిత విద్యుత్ లభించనుంది. నేతన్నల ఉచిత విద్యుత్ పథకం కోసం ఏపీ ప్రభుత్వం రూ.125 కోట్ల వ్యయాన్ని భరించనుంది. ఈ చర్య చేనేత రంగానికి గణనీయమైన ఊరటనిస్తుందని, వారి ఆర్థిక భారాన్ని తగ్గిస్తుందని భావిస్తున్నారు.
ఈ ఉచిత విద్యుత్ పథకం ద్వారా సుమారు 50 వేల మగ్గాలు మరియు 15 వేల మర మగ్గాలు కలిగిన చేనేత కుటుంబాలకు లబ్ధి చేకూరనుంది. చేనేతలకు ఇచ్చిన ఎన్నికల హామీని ముఖ్యమంత్రి చంద్రబాబు నాయుడు దృష్టికి మంత్రి సవిత తీసుకెళ్లగా, జాతీయ చేనేత దినోత్సవానికి వారం ముందుగానే ఈ ఉచిత విద్యుత్ పథకం అమలుకు సీఎం చంద్రబాబు నిర్ణయం తీసుకున్నారు. చేనేతలకు ఇచ్చిన ఎన్నికల హామీని నెరవేర్చినందుకు ముఖ్యమంత్రి చంద్రబాబుకు మంత్రి సవిత ధన్యవాదాలు తెలిపారు. కడప జిల్లాలోని జమ్మలమడుగులో ఈరోజు (శుక్రవారం) సీఎం చంద్రబాబు పర్యటించిన సందర్భంగా చేనేతల ఉచిత విద్యుత్ అమలుపై ఈ కీలక నిర్ణయం తీసుకున్నారు.
Karnataka : గుమస్తాకు కళ్లు చెదిరే ఆస్తులు..24 ఇళ్లు, 30 కోట్ల ఆస్తులు..షాక్‌ తిన్న అధికారులు
మరోవైపు, వైసీపీ ప్రభుత్వం నిలిపివేసిన రాజధాని రైతు కూలీ పెన్షన్లను కూటమి ప్రభుత్వం తిరిగి మంజూరు చేసింది. ఈ సందర్భంగా కృష్ణయపాలెం గ్రామంలో ముఖ్యమంత్రి చంద్రబాబు నాయుడు, ఉపముఖ్యమంత్రి పవన్ కల్యాణ్, మంత్రి నారా లోకేష్ చిత్రపటాలకు రాజధాని రైతులు పాలాభిషేకం చేశారు. గత వైసీపీ ప్రభుత్వం అధికారంలోకి రాగానే రాజధాని రైతు కూలీ పెన్షన్లను నిలిపివేసింది, దీంతో వేలాది మంది రైతు కూలీలు ఆర్థికంగా ఇబ్బందులు పడ్డారు. కూటమి ప్రభుత్వం అధికారంలోకి రాగానే పెన్షన్లను యథావిధిగా కొనసాగిస్తామని ఎన్నికల ప్రచారంలో చంద్రబాబు హామీ ఇచ్చారు.
ఇచ్చిన మాటకు కట్టుబడి చంద్రబాబు పెన్షన్లను మంజూరు చేయటం పట్ల రాజధాని ప్రాంత రైతు కూలీలు హర్షం వ్యక్తం చేశారు. ఈ నిర్ణయంతో రాజధాని ప్రాంత రైతు కూలీలకు తిరిగి ఆర్థిక భరోసా లభించినట్లయింది. ముఖ్యమంత్రి చంద్రబాబు నాయుడు తీసుకున్న ఈ రెండు నిర్ణయాలు – చేనేతలకు ఉచిత విద్యుత్, రాజధాని రైతు కూలీ పెన్షన్ల మంజూరు – ప్రజల సంక్షేమానికి తమ ప్రభుత్వం కట్టుబడి ఉందని తెలియజేస్తున్నాయి.