ఆంధ్రప్రదేశ్‌లోని అట్టడుగు వర్గాల సాధికారత కోసం రాష్ట్ర ప్రభుత్వం ప్రతిష్టాత్మకంగా ప్రవేశపెట్టనున్న ‘పీ4’ (Public Philanthropic People Participation) కార్యక్రమం ఉగాది నుండి అమలులోకి రానుంది. పేదలకు ఆర్థికంగా బలోపేతం చేయడానికి, వారికి అదనపు చేయూత అందించడానికి ఈ విధానం రూపుదిద్దుకుంది. ముఖ్యమంత్రి చంద్రబాబు నాయుడు ఆధ్వర్యంలో ‘ఫ్యామిలీ ఎంపవర్‌మెంట్ – బెనిఫిట్ మేనేజ్‌మెంట్ సిస్టమ్‌’ పై గురువారం అధికారులతో సమీక్ష నిర్వహించగా, మొదటగా రాష్ట్రంలోని 4 గ్రామాల్లో పైలట్ ప్రాజెక్టుగా దీన్ని అమలు చేయాలని నిర్ణయించారు. ఈ పైలట్ ప్రాజెక్ట్ ద్వారా 5,869 కుటుంబాలు లబ్ధి పొందనున్నాయి.
అర్హుల గుర్తింపు కోసం హౌస్‌హోల్డ్ సర్వే
పీ4 ద్వారా లబ్ధి పొందే అర్హులైన కుటుంబాలను గుర్తించేందుకు ప్రభుత్వం జీఎస్‌డబ్ల్యుఎస్ డేటాబేస్, హౌస్‌హోల్డ్ సర్వే, గ్రామసభ ధృవీకరణలను ఆధారంగా తీసుకుంటోంది. 2 ఎకరాల మాగాణి లేదా 5 ఎకరాల మెట్ట భూమి కలిగిన భూ యజమానులు, ప్రభుత్వ ఉద్యోగులు, ఆదాయపన్ను చెల్లించే వారు, ఫోర్ వీలర్ వాహనం కలిగిన వారు, 200 యూనిట్లకంటే ఎక్కువ విద్యుత్ వినియోగించేవారు, మున్సిపల్ ప్రాంతాల్లో సొంత ఇళ్లు ఉన్నవారు ఈ కార్యక్రమం నుంచి మినహాయించబడతారు. ఈ విధానం ద్వారా నిజమైన పేదరికంలో ఉన్నవారిని గుర్తించి వారికి ప్రభుత్వ సహాయం అందించడమే లక్ష్యంగా ఉంది.
సమృద్ధి బంధనం ద్వారా అనుసంధానం
లబ్దిదారుల ధృవీకరణ పూర్తయ్యాక, సమృద్ధి బంధనం ప్లాట్‌ఫామ్ ద్వారా ఆయా కుటుంబాల వివరాలను పొందుపరుస్తారు. ఈ కార్యక్రమంలో ప్రభుత్వ పాత్ర అనుసంధానం వరకే పరిమితం అవుతుంది. లబ్ధిదారుల కుటుంబాలను, సహాయం చేయదలచుకున్న కుటుంబాలను అనుసంధానం చేయడం, తగిన విధంగా మానిటరింగ్ చేయడం మాత్రమే ప్రభుత్వం చూస్తుంది. ఇందులో ఎటువంటి ఆర్థిక ఒత్తిడి ఉండదని, పూర్తిగా స్వచ్ఛందంగా మాత్రమే ఈ కార్యక్రమంలో భాగస్వామ్యం అవ్వచ్చని ప్రభుత్వం స్పష్టం చేసింది.
పేదరికం నిర్మూలన లక్ష్యంగా పీ4
ఈ ఉగాది నాటికి ‘పీ4’ ప్రారంభమవుతుండగా, 2024 ఆగస్టు నాటికి 5 లక్షల పేద కుటుంబాలను ఈ పథకం కింద తీసుకురావాలని రాష్ట్ర ప్రభుత్వం లక్ష్యంగా పెట్టుకుంది. ఈ ప్రణాళిక విజయవంతమైతే, రాష్ట్రంలో పేదరికం గణనీయంగా తగ్గుతుందని విశ్లేషకులు భావిస్తున్నారు. ప్రస్తుతం ప్రభుత్వం అమలు చేస్తున్న పథకాలతో పాటు ‘పీ4’ అదనపు భరోసా కల్పించనుంది. పేద కుటుంబాలకు మాత్రమే కాకుండా, సామాజికంగా ఉన్నత వర్గాలు కూడా ఈ కార్యక్రమంలో భాగస్వామ్యం అయ్యేందుకు ఆసక్తి చూపిస్తే, పేదరిక నిర్మూలన లక్ష్యం మరింత వేగంగా సాధించవచ్చని ప్రభుత్వ వర్గాలు చెబుతున్నాయి.