వ‌చ్చే ఏడాది చివ‌రికి వెలిగొండ ప్రాజెక్టును పూర్తి చేయాలని అధికారులకు సీఎం జగన్ డెడ్ లైన్ పెట్టారు. ఆ మేర‌కు పనులను వేగవంతం చేయాలని ఆదేశించారు. వెలిగొండ ప్రాజెక్ట్ టన్నెల్-2పై సమీక్షించిన సీఎంకు టన్నెల్ 2లో నెలకు 350 మీటర్ల మేర తవ్వకం పనులు జరుగుతున్నాయని అధికారులు వివరించారు. వంశధార ప్రాజెక్ట్ స్టేజ్‌-2లో ఫేజ్‌ 2 పనులు దాదాపు పూర్తికాగా, అక్టోబర్‌లో ప్రారంభోత్సవానికి సిద్ధం కానుంది.
ఉత్తరాంధ్ర సుజల స్రవంతి, మహేంద్రతనయ, తారకరామతీర్థ సాగర్‌ గజపతినగరం బ్రాంచ్‌ కెనాల్ ప్రాజెక్టులతో పాటు రాయలసీమ జోలదరాశి, రాజోలిబండ, కుందూ లిఫ్ట్‌, వేదవతి, ఆర్‌డీఎస్‌, చింతలపూడి సహా మొత్తం 27 ప్రాజెక్టుల పనులు వేగవంతం చేయాలని జగన్ అధికారులకు సూచించారు. మడకశిర బైపాస్ కెనాల్, బైరవ తిప్ప, వరికేసలపూడి ప్రాజెక్టులకు నీటి సౌకర్యాల విషయంలో దశాబ్దాలుగా వెనుకబడిన పశ్చిమ కర్నూలు ప్రాంతంపై ప్రత్యేక దృష్టి సారించాలన్నారు. వలసల నివారణకు అధికారులు ప్రణాళికలు రూపొందించాలన్నారు.
భూమి లేని కుటుంబాలకు ఒక్కొక్కరికి ఒక ఎకరం భూమిని అందించాలని, ఈ ప్రాంతంలో ఐటీఐలు, పాలిటెక్నిక్‌లు, ఇంజినీరింగ్ కళాశాలలు, ఇతర విద్యాసంస్థలను కూడా ఏర్పాటు చేద్దామ‌ని హామీ ఇచ్చారు. వరద తగ్గుముఖం పట్టిన తర్వాత పోలవరం ప్రాజెక్టు పనులను పునఃప్రారంభించేందుకు రాష్ట్రం సిద్ధమైందని ముఖ్యమంత్రి జగన్ రెడ్డి తెలిపారు. వరదల కారణంగా దెబ్బతిన్న ప్రాజెక్టు పనులతో పాటు జలవనరుల శాఖ ఇతర పనులపై ముఖ్యమంత్రి సమీక్ష నిర్వహించారు. పోలవరంలో ముఖ్యమైన పనులు చేపట్టేందుకు కేంద్రం నుంచి తాత్కాలికంగా నిధులు కోరాలని జగన్ ఉద్ఘాటించారు. ఈ ఖర్చును కేంద్రం భరించాల్సి ఉన్నప్పటికీ రాష్ట్రం తన సొంత నిధులతో పనుల కోసం రూ.2,900 కోట్లు ఖర్చు చేసింది. వరదలు తగ్గుముఖం పట్టిన వెంటనే ప్రాజెక్టు పనులను వేగవంతం చేసేందుకు కేంద్రం నుంచి కాంపోనెంట్ల వారీగా రీయింబర్స్‌మెంట్‌కు బదులుగా తాత్కాలిక ప్రాతిపదికన రూ. 6,000 కోట్ల అదనపు నిధులను కోరనున్నామని ఆయన చెప్పారు.
కుడి, ఎడమ కాల్వల అనుసంధాన పనులతోపాటు హెడ్‌ వర్క్స్‌పై అధికారులు ప్రత్యేక దృష్టి సారించాలని కోరారు. ప్రాజెక్టు ఈసీఆర్‌ఎఫ్‌ డ్యాంలో గతంలో ఏర్పడిన గ్యాప్-1, గ్యాప్-2ల భర్తీపై అధికారులతో సీఎం చర్చించారు. గ్యాప్-1, గ్యాప్-2 పనులకు సంబంధించి తొమ్మిది రకాల పరీక్షలు నిర్వహించి నివేదికలు అందించాల్సి ఉందని అధికారులు తెలిపారు. కొన్ని పరీక్షలు పూర్తయ్యాయని, మిగిలినవి వరదలు తగ్గుముఖం పట్టిన తర్వాత చేయాలన్నారు. దిగువ కాఫర్‌డ్యామ్‌ పనులకు కూడా వరదల కారణంగా అంతరాయం ఏర్పడిందని, నీటిమట్టం 2 లక్షల క్యూసెక్కులకు తగ్గిన తర్వాత పనులు పునరుద్ధరిస్తామని చెప్పారు.
నెల్లూరు బ్యారేజీ, ఎంజీఆర్‌ఎస్‌ బ్యారేజీల విషయానికొస్తే.. వీటి పనులు దాదాపుగా పూర్తయ్యాయని, ఆగస్టు మూడో వారంలోగా వీటిని ప్రారంభించవచ్చని అధికారులు చెబుతున్నారు. ఔక్ టన్నెల్-2 పనులు దసరా నాటికి పూర్తి చేయాలని చెప్పారు. మొత్తం మీద పోలవరం, వెలిగొండ‌తో పాటు పెండింగ్ లో ఉన్న ప్రాజెక్టుల పూర్తికి జగన్ దిశానిర్దేశం చేశారు.