Amaravati : ఆంధ్రప్రదేశ్ అభివృద్ధికి మరో కీలక అడుగుగా, సీఎం నారా చంద్రబాబు నాయుడు నేతృత్వంలో రాష్ట్ర ప్రభుత్వం రతన్టాటా ఇన్నోవేషన్ హబ్ ఏర్పాటు పనులకు శ్రీకారం చుట్టింది. మంగళగిరిలోని మయూరి టెక్ పార్క్ ప్రాంగణంలో ఈ కేంద్రాన్ని లాంఛనంగా ప్రారంభించారు. ముఖ్యమంత్రి చంద్రబాబు, ఐటి శాఖ మంత్రి నారా లోకేశ్ ఈ కార్యక్రమంలో పాల్గొని ప్రారంభ ఘట్టానికి నాంది పలికారు. ఈ హబ్ సుమారు 50,000 చదరపు అడుగుల విస్తీర్ణంలో నిర్మించనున్నారు. ఇది ఆంధ్రప్రదేశ్ మాత్రమే కాక, దేశం మొత్తానికి ఒక ప్రధాన స్టార్టప్, డీప్ టెక్, కృత్రిమ మేధ, సుస్థిర ఆవిష్కరణల కేంద్రంగా మారేలా కార్యాచరణ సిద్ధమైంది. ఈ ప్రాజెక్టును అమరావతిని కేంద్రంగా అభివృద్ధి చేయడమే లక్ష్యంగా పెట్టుకున్నారు.
Read Also: Indian Railways : భారత రైళ్లలో లగేజీపై కొత్త నిబంధనలు.. విమానాల తరహాలో కొత్త రూల్స్!
ఈ ఇన్నోవేషన్ హబ్ ద్వారా రాష్ట్రం క్వాంటమ్ వ్యాలీగా రూపుదిద్దుకునే దిశగా అడుగులు వేస్తోంది. దీని ద్వారా ప్రపంచ స్థాయి మేధ, పరిశోధన, ఆవిష్కరణలను రాష్ట్రానికి ఆకర్షించేలా పునర్నిర్మాణ ప్రణాళికలు రూపొందిస్తున్నారు. విశ్వవ్యాప్త పెట్టుబడులు, నూతన ఆవిష్కరణల పై ఆధారపడిన వ్యూహాలతో సుస్థిర ఆర్థిక వ్యవస్థను ఏర్పరచే దిశగా ఈ హబ్ పనిచేస్తుంది. ఈ కేంద్రము చిన్న, మధ్య తరహా స్టార్టప్లకు పెద్ద దిశానిర్దేశకంగా నిలిచే అవకాశముంది. యువ పారిశ్రామికవేత్తలు, శాస్త్రవేత్తలు, టెక్నాలజీ రంగంలో ఉన్న ప్రతిభావంతులు తమ ఆవిష్కరణలను ప్రదర్శించేందుకు, వాణిజ్యవేత్తల నుంచి పెట్టుబడులు పొందేందుకు ఇది సరైన వేదికగా మారనుంది.
ఈ కార్యక్రమం ప్రారంభోత్సవంలో సీఎం చంద్రబాబు నాయుడు మాట్లాడుతూ..ఆంధ్రప్రదేశ్ను టెక్నాలజీ, ఇన్నోవేషన్ రంగాల్లో దేశానికి మార్గనిర్దేశకంగా తీర్చిదిద్దే లక్ష్యంతో ఈ హబ్ ప్రారంభించాం. ఇది కేవలం టెక్ హబ్ మాత్రమే కాదు, ఒక భవిష్యత్ భారత్కు పునాది వేసే ఆవిష్కరణ కేంద్రంగా మారనుంది అని తెలిపారు. ఇక, మంత్రి నారా లోకేశ్ మాట్లాడుతూ..ఈ హబ్ ద్వారా యువతకు నూతన అవకాశాలు లభిస్తాయి. స్టార్టప్లకు కావలసిన మౌలిక వసతులు, మెంటారింగ్, పెట్టుబడులు అన్ని ఒకే చోట లభిస్తాయి. ఇది తెలుగువారికి సాంకేతిక రంగంలో పెద్ద దిమ్మతిరిగించే ఆవిష్కరణగా నిలుస్తుంది అని చెప్పారు. ఈ విధంగా, రతన్టాటా ఇన్నోవేషన్ హబ్ ద్వారా అమరావతి, మంగళగిరి ప్రాంతాలు ఒక కొత్త టెక్ కేంద్రముగా మారేందుకు ఆసక్తికరమైన దారులు తెరుచుకున్నాయి. ఇది యువతకు ఉపాధి అవకాశాలు, పరిశోధనలకు ప్రేరణ, మరియు గ్లోబల్ కనెక్టివిటీకి అద్భుత వేదికగా మారనుంది.