Social Media: ఆంధ్రప్రదేశ్ ప్రభుత్వం రాష్ట్రంలో సోషల్ మీడియా (Social Media) కార్యకలాపాలపై నిఘా ఉంచడానికి, ప్రజల్లో తప్పుడు వార్తలు, తప్పుడు సమాచారం (ఫేక్ న్యూస్) వ్యాప్తిని అరికట్టడానికి కొత్తగా మంత్రివర్గ ఉపసంఘం (Group of Ministers – GoM)ను ఏర్పాటు చేసింది. వందలాది మంది ప్రజలను ప్రభావితం చేసే తప్పుడు సమాచారంపై అడ్డుకట్ట వేయడం దీని ముఖ్య ఉద్దేశం. నేపాల్, లడఖ్‌లలో జరిగిన హింసకు సోషల్ మీడియా ముఖ్య కారణంగా నిలిచిన నేపథ్యంలో రాష్ట్ర ప్రభుత్వం ఈ పటిష్ట చర్య తీసుకోవడం ప్రాధాన్యత సంతరించుకుంది.
కూట‌మి ప్రభుత్వం కీలక నిర్ణయం
సోషల్ మీడియాపై పర్యవేక్షణ ఉంచడానికి, తప్పుడు సమాచారంపై అంకుశం వేయడానికి ఆంధ్రప్రదేశ్ ప్రభుత్వం ఈ GoMను ఏర్పాటు చేసింది. ఈ కమిటీ ముఖ్య లక్ష్యం సోషల్ మీడియా ప్లాట్‌ఫారమ్‌ల బాధ్యతలను నిర్ణయించడం, తప్పుడు సమాచారాన్ని అడ్డుకోవడం, పౌరుల హక్కులను పరిరక్షించడం.
Also Read: West Indies: భారత బౌలర్ల ధాటికి విండీస్‌ 162 పరుగులకే ఆలౌట్‌!
ఈ కొత్త మంత్రివర్గ ఉపసంఘంలో ఈ క్రింది మంత్రులు సభ్యులుగా ఉన్నారు.
- ఐటీ, మానవ వనరుల అభివృద్ధి (HRD) మంత్రి నారా లోకేశ్
- ఆరోగ్య శాఖ మంత్రి వై. సత్య కుమార్ యాదవ్
- పౌర సరఫరాల శాఖ మంత్రి నాదెండ్ల మనోహర్
- గృహ నిర్మాణ, ఐ అండ్ పీఆర్ మంత్రి కొలుసు పార్థ‌సార‌ధి
- హోంమంత్రి వంగలపూడి అనిత
కమిటీ అవసరం ఎందుకు ఏర్పడింది?
ఇటీవల నేపాల్, లడఖ్‌లలో జరిగిన హింసాత్మక ఘటనల్లో సోషల్ మీడియా Gen-Zపై చూపిన ప్రభావం స్పష్టంగా కనిపించింది. కొంతమంది అల్లరి మూకలు సోషల్ మీడియాను దుర్వినియోగం చేస్తూ సమాజంలో హింస, అరాచకాన్ని వ్యాప్తి చేస్తున్నారు. అనేక సందర్భాల్లో వదంతులు, తప్పుడు సమాచారం కారణంగా పెద్ద ఎత్తున హింసాత్మక సంఘటనలు జరిగాయి. దీని వల్ల ఆస్తి నష్టంతో పాటు ప్రాణ నష్టం కూడా సంభవిస్తుంది. లడఖ్‌లో కూడా ప్రత్యేక రాష్ట్రం కోసం జరిగిన నిరసనల్లో సోషల్ మీడియా ద్వారా రెచ్చగొట్టే ప్రసంగాలు వ్యాపించడం వల్లే హింస చెలరేగింది.
కమిటీ విధి విధానాలు ఏమిటి?
ఈ కొత్త కమిటీకి ఇప్పటికే ఉన్న చట్టాలు, అంతర్జాతీయ పద్ధతులు, ప్లాట్‌ఫారమ్‌ల జవాబుదారీతనాన్ని సమీక్షించే బాధ్యతను అప్పగించారు. సమాజంలో శాంతి, సామరస్యం నెలకొనడానికి సోషల్ మీడియాపై పర్యవేక్షణ, నియంత్రణ చాలా అవసరం. ఆంధ్రప్రదేశ్ ప్రభుత్వం తీసుకున్న ఈ చర్య సోషల్ మీడియా దుర్వినియోగాన్ని అరికట్టి, సమాజంలో శాంతిని నెలకొల్పడానికి ఎలా ఉపయోగపడుతుందో ఇతర రాష్ట్రాలకు కూడా ఒక ఉదాహరణగా నిలవవచ్చు.