Julian Assange : యూకేలో 62 నెలల జైలుశిక్షను అనుభవించిన తర్వాత వికీలీక్స్ వ్యవస్థాపకుడు 52 ఏళ్ల జూలియన్ అసాంజేకు ఎట్టకేలకు విముక్తి లభించింది. బ్రిటన్లోని హై సెక్యూరిటీ జైలు ‘బెల్మార్ష్’ నుంచి అసాంజేను విడుదల చేశారు. అదనపు జైలు శిక్ష విధించకూడదన్న తన షరతుకు అమెరికా న్యాయశాఖ సమ్మతి తెలపడంతో.. ఆ దేశ రహస్య పత్రాలను లీక్ చేసి గూఢచర్య చట్టాలను ఉల్లంఘించినట్లుగా అసాంజే అంగీకరించాడు. బ్రిటన్లోని హై సెక్యూరిటీ జైలు ‘బెల్మార్ష్’ వేదికగా ఆయన తన నేరాన్ని ఒప్పుకున్నారు. అమెరికా ప్రభుత్వ గూఢచర్య చట్టాన్ని ఉల్లంఘించానని అసాంజే చెప్పాడు. ఆ వెంటనే లండన్లోని హైకోర్టు ఆయనకు బెయిల్ మంజూరు చేసింది. దీంతో ఎట్టకేలకు 1901 రోజుల నిర్బంధం తర్వాత బ్రిటన్ సర్కారు జూలియన్ అసాంజేను జైలు నుంచి రిలీజ్ చేసింది. జైలు నుంచి నడుచుకుంటూ బయటకు వచ్చిన ఆయన.. కారులో నేరుగా స్టాన్స్టెడ్ విమానాశ్రయానికి బయలుదేరారు. బ్రిటన్ నుంచి అసాంజే నేరుగా అమెరికాకు చేరుకోనున్నారు. బుధవారం ఉదయం 9 గంటలకు ఆయన అమెరికాలోని సైపాన్లో ఉన్న ఓ కోర్టు ఎదుట విచారణకు హాజరై, తాను నేరాలను అంగీకరించిన విషయాన్ని చెప్పనున్నారు. తదుపరిగా కోర్టు అనుమతితో అక్కడి నుంచి తన స్వదేశం ఆస్ట్రేలియాకు అసాంజే చేరుకుంటారని తెలుస్తోంది.
We’re now on WhatsApp. Click to Join
జూలియన్ అసాంజే జైలు నుంచి విడుదలైన నేపథ్యంలో వికీలీక్స్ ట్విట్టర్ వేదికగా ఒక పోస్ట్ పెట్టింది. ఆయనకు ఎట్టకేలకు జైలు నుంచి విముక్తి లభించింది అని ఆ పోస్టులో రాసుకొచ్చింది. అసాంజే భార్య స్టెల్లా కూడా ఎక్స్లో ఓ పోస్టు పెట్టారు. అసాంజే విడుదలపై ఆమె హర్షం వ్యక్తం చేశారు. 2006లో వికీలీక్స్ను అసాంజే ప్రారంభించారు. ప్రజలు వాళ్ల సమాచారం చెప్పకుండానే కీలక డాక్యుమెంట్లు, వీడియోలను సమర్పించే ఆన్లైన్ వేదికగా వికీలీక్ మారడం అప్పట్లో పెనుసంచలనం క్రియేట్ చేసింది. ఇరాక్లోని బాగ్దాద్లో అమెరికాకు చెందిన అపాచీ హెలికాప్టర్ నుంచి జరిపిన దాడిలో ఇద్దరు జర్నలిస్టులతో సహా డజను మంది చనిపోయిన ఫొటోలు లీక్ కావడంతో అప్పట్లో వికీలీక్ పేరు అంతటా మార్మోగింది. 2010లో ఆఫ్ఘనిస్తాన్, ఇరాక్లలో జరిగిన యుద్ధాలకు సంబంధించిన వందలాది అమెరికా ప్రభుత్వ రహస్య డాక్యుమెంట్లను కూడా వికీలీక్స్ బయటపెట్టింది.